Пăрăнтăк ялĕ картта çинче

Атăл тăрăхĕнче шăрăх çанталăк хуçаланать. Çумăрĕ те пулин çумасть-çке. Çакнашкал лару-тăру хăш-пĕр ыйтăва уçăмлăн çĕклет, уйрăмах халăха шывпа тивĕçтерессине. Шыв пулмасан кăçалхи çу кунĕнче ытла та йывăр-çке — çăлкуçсем типе-типе лараççĕ, юханшывсемпе пĕвесенче шыв хухать. Пĕлтĕр кăна сиксе каçмалла мар шыв урлă кăçал ним мар утса каçан. Ялти шыв башни ĕçлемесен вара — чĕр нуша.

Ял халăхĕ вара кăçал тинех манăçа тухнă çăлсемпе çăлкуçсем пирки асаиле пуçларĕ. Трак тăрăхĕнчи Пăрăнтăк çыннисем те хăйсен çăлкуçне тирпей кĕртме шутларĕç. Гагарин урамĕнче пурăнакансем утăн 21-мĕшĕнче пухăнчĕç те кĕреçесем йăтса çав çăлкуçа тасатрĕç. Романов Вячеслав, Митрофанов Вениамин, Герасимов Геннадий, Иванов Валерий, Максимов Владимир кунĕпе ĕçлерĕç те çăлкуçа тирпей кĕртрĕçех.

Халĕ ĕнтĕ кунти сиплĕ шыва пурте килсе ĕçейреççĕ.