Матвеева Галина Алексеевна (чӑн хушамачӗ — Антонова; Матвеева псевдоним — ашшӗне асра тытса хӑварнӑ хӗр чухнехи хушамачӗ) — чӑваш журналисчӗ, ҫыравҫи, куҫаруҫи, редакторӗ. Раҫҫей журналистсен пӗрлӗхӗн (1983) тата Раҫҫей ҫыравҫисем пӗрлӗхӗн (2019) членӗ. Чӑваш Республикин тава тивӗҫлӗ культура ӗҫченӗ (2012).

Пурнӑҫӗ

Галина Алексеевна Матвеева 1957 ҫулхи нарӑсӑн 19-мӗшӗнче Чӑваш АССРӗн Вӑрнар районӗнчи Аҫӑм Ҫырми ялӗнче нумай ачаллӑ семьере ҫуралнӑ. Ашшӗ — Матвеев Алексей Матвеевич, Аслӑ Тӑван Ҫӗршыв вӑрҫине хутшӑннӑскер, пурнӑҫран ир уйрӑлса ултӑ ачана тӑлӑха хӑварнӑ. Амӑшӗ — Матвеева Васса Михайловна, колхоз ӗҫченӗ.

Шкулта вӗреннӗ ҫулсенче республикӑри ача-пӑча валли кӑларакан «Пионер сасси» хаҫатпа, районти «Ҫӗнтерӳ ҫулӗ» хаҫатпа, ҫавӑн пекех Чӑваш радиовӗн ача-пӑча кӑларӑмӗсен редакцийӗпе ҫыхӑнса ӗҫленӗ.

Аҫӑм Ҫырминчи сакӑр ҫул вӗренмелли шкула (1972), унтан Вӑрнар районӗнчи Нурӑс вӑтам шкулне (1974) вӗренсе пӗтернӗ. 1980 ҫулта А. М. Горький ячӗллӗ Урал патшалӑх университечӗн журналистика факультетне вӗренсе пӗтернӗ.

Ӗҫӗ-хӗлне 1980 ҫулхи утӑн 1-мӗшӗнче республикӑри «Коммунизм ялавӗ» (1991 ҫултанпа — «Хыпар») хаҫат редакцийӗнче пуҫланӑ, унта вӑл умлӑн-хыҫлӑн корреспондент, аслӑ корреспондент тата пай пуҫлӑхӗ (1999 ҫулччен) пулса ӗҫленӗ.

1999–2003 ҫулсенче — республикӑри «Хресчен сасси» хаҫатӑн тӗп редакторӗн ҫумӗ.

2003–2006 ҫулсенче — «Советская Чувашия» хаҫатӑн аслӑ корреспонденчӗ тата тишкерӳҫи.

2006 ҫултанпа Чӑваш кӗнеке издательствинче ӗҫлет: 2007–2014 ҫулсенче — тӗп редактор ҫумӗ; 2014 ҫултанпа — илемлӗ литература редакцийӗн ертсе пыракан редакторӗ. Вӑл редакциленипе, сӑмахран, Геннадий Волковӑн «Кил илемӗ» кӗнеки, «Асанне юмахӗсем» (Вера Голубева репертуарӗнчи юмахсем), «Чувашские легенды и сказки» тата ытти кӑларӑмсем пичетленсе тухнӑ.

Пултарулӑхӗпе куҫару ӗҫӗ

Галина Матвеева — экологи, культура, литература тата ӳнер, нацисемпе тӗнсем хушшинчи хутшӑнусен темисемпе ҫырнӑ публикацисен авторӗ. Унӑн сӑввисемпе калавӗсем республикӑри хаҫат-журналсенче, ҫавӑн пекех хайлавсен пуххисенче кун ҫути курнӑ.

Вӑл вырӑс чӗлхинчен чӑвашла куҫаракан пек те паллӑ. Вӑл куҫарнипе Д. Суслинӑн, Л. Кадкинӑн, Ж. Яновскаян, А. Растворцевӑн, Н. Васильевана, Ортем Галин, ҫавӑн пекех Астрид Линдгренӑн хайлавӗсем пичетленсе тухнӑ.

Тӗп кӗнекисем

• «Хамӑркка» (2011);
• «Чӑваш» (2013);
• «Его звали Чуваш» (2015);
• «Курак тӑманӗ» (2016);
• «Полина Чамжаева: Сцена ҫинче тӗнче ҫаврӑнать» (2018);
• «Мӑшӑр ҫунат» (2019).

Тӗп куҫарӑвӗсем

• Д. Суслин. «Юрапи» (2008);
• Д. Суслин. «Димка ашшӗне шырать» («Димка ищет папу») (2009);
• Л. Кадкин. «Ҫунатлӑ ҫунашка» («Детство на гору спешит») (2009);
• Д. Суслин. «Хӑрушӑ вӑрттӑнлӑх» («Опасная тайна») (2011);
• Ж. Яновская. «Карап ӑсти» («Академик корабельной науки») (2012).

Хисепӗсем

• Чӑваш Республикин Хисеп хучӗ (1997);
• Чӑваш Республикин журналистсен пӗрлӗхӗн Хисеп хучӗ (2001);
• Пӗтӗм Раҫҫейри журналистсен «Экология России» VI конкурсӗн лауреачӗ (2001);
• Чӑваш Республикин культура тата ӳнер темине чи лайӑх ҫутатнӑшӑн ирттерекен республикӑри МИХсен III конкурсӗн ҫӗнтерӳҫи (2003);
• Пӗтӗм Раҫҫейри регион прессин «Без розни и вражды» конкурсӗн призёрӗ (2006);
• Чӑваш Республикин Культура, нацисен ӗҫӗсен, информаци политикин тата архив ӗҫӗн министерствин Хисеп хучӗ (2007);
• С. В. Элкер ячӗллӗ республикӑри журналистсен премийӗн лауреачӗ (2007);
• Чӑваш Республикин тава тивӗҫлӗ культура ӗҫченӗ (2012);
• Ача-пӑчапа ҫамрӑксем валли ҫырнӑ кӗнеке алҫырӑвӗсен республика конкурсӗн ҫӗнтерӳҫи (2012, 2015, 2018);
• И. Н. Ивник ячӗллӗ литература премийӗн лауреачӗ (2013);
• Раҫҫей журналистсен пӗрлӗхӗн Хисеп хучӗ (2009);
• «Литературӑллӑ Чӑваш Ен: ҫулталӑкри чи нумай вуланакан кӗнеке» республика конкурсӗн ҫӗнтерӳҫи (2018–2019) — «Мӑшӑр ҫунат» кӗнекешӗн;
• Раҫҫей ҫыравҫисен пӗрлӗхӗн членӗ (2019).