Те кăмăл вара çĕтĕк-çурăк,
Е çиллĕм ытла та кăра.
Тĕсе уйракан техĕм çук-тăр:
Шурри те курнать пек хура.
Хĕрлехчĕ ĕнер хĕвелтухăç,
Хитрехчĕ хитре улмуççи,
Такам пырса сапрĕ пĕр ывăç
Хаярлăх вăрри — чун йӳççи.
Пĕр каç хушшинчех-ши йăл илчĕ?
(Усалăн вĕт вăйĕ — усал.)
Йăл-йăл çиçекен хĕвел пичĕ
Йăлттийĕ ун чух — çур пуса.
Пуçа усмаллаччĕ — усмарăм,
Çĕклентĕм çиллес çилĕпе.
Хаярлăх вăрри сапаларăм
Халь хам та вара çĕрĕпе.
Пуçа усмаллаччĕ...
Усмарăм...
Ку айăп та — ман айăпах.
Чĕр вăрă мĕн-ма сапаларăм —
Усаллăх вăрри... хам алпах...