Ирпе ирех юрлать садри саркайăк
Ун чĕпписем савнаççĕ çак юрра илтсе.
Çакăн пек чух ман кăмăл та пит лайăх,
Чĕре юрлать çут çăлтăрсем патне çитсе.
Саркайăкăн юрри — анне юррийĕ евĕр
Чăнах та чунăма çĕклет çӳл тӳпене.
Анне юррисене аса илмесĕр
Пĕр кун иртмест килтен инçе чухне.
Ачалăха час-час аса илетĕп:
Ытла тискер пыратчĕ вăрçă ун чухне.
Эп вăрçăпа асапланса йĕреттĕм,
Анне юр юрласа лăпкатчĕ ачине.
Анне юррипеле ыйха путаттăм,
Хам выçă пулнине йăлтах манса...
Саркайăк юррине илтсе умра кураттăм
Юратнă аннене, вăл çуккине манса.