«Эсĕ пур» теекен шухăшпа
Йăпанатăп, — эс сассăр чухне.
Тен, хĕртмесĕр лăпкан çутăпа
Ашăнатпăр çапла — кĕр енне.
Эп ыйтни вăл — ĕçмар, сăмах мар.
Мĕн-ха вăл? Ун пĕлтерĕш — епле?..
Эсĕ — пур. Сахал мар та, — калар:
Нумаях та-çке мар, — темелле...
Куç — чĕр пурнăç, чĕр сăн çеç ыйтать.
Çук — ыйтни. Чун çапах ăшăра:
Те чĕре манăçса улталать,
Те иртнин ĕмĕлки асăмра?
Пăшăлтатнă пек, ман кун-çулта
«Эсĕ — пур» тени пур-çке пĕрех, —
Типĕ шĕшкĕ çулçи вăрманта
Чăвашла чăштăртатнă пекрех...