Тӳпемĕр пĕр шывсăр, тăп-тăрă,
Хрусталь пек илемлĕ инçет.
Юратнă çĕршывăмăр тăрăх
Хаваслăх хĕвел пек çиçет.
Паян ачасем те ян саслă:
Халь çăкăр пурне те çитет, —
Курса тӳснине асăнсассăн
Чĕреçĕм уксахлăн сикет.
...Атака! Çĕклентĕмĕр пурте.
Сунтал пек тĕнче кисренет.
Вилес çĕленле тăшман урчĕ:
Суранлă çерем вистенет.
Унта та кунта хыпать çулăм,
Снаряд ухлатса вăркăнать.
Ӳкмесĕр çĕр утăм пуль турăм —
Умра... пирĕн ротнăй выртать.
Куклентĕм те:
— Тусăм, мĕн пулчĕ?
— Эп... çитрĕм... — чĕтренчĕ ответ.
Унтан капитан юнлă сурчĕ:
— Илсем манăнне партбилет.
Чĕреçĕм пăрланчĕ чул евĕр.
Пĕлетĕп: тăванлăх çук мар,
Анчах та, ах, мĕншĕн этемлĕх
Вăрçма тытăнсассăн хаяр?
Йĕрет, ĕсĕклет хуçăк хурăн.
Хĕп-хĕрлĕ куççульлĕ пилеш:
— Ан парăн эс, ИРĔКЛĔХ, пурăн,
Этемлĕх ăс-тăнĕ, пĕрлеш!
Ӳкет тӳперен çăра хăрăм,
Вутпа хупăрланнă тĕнче.
— Çĕнетпĕр! — тесе тупа турăм
Куç хупнă юлташ умĕнче.
Çунатчĕ Украина çĕре,
Нумаййăн пуç хучĕç туссем...
Суранăм ман халĕ те чĕрĕ —
Ан тĕлĕнĕр эпĕ... ӳксен.
Куратăп: халь пирĕн тавралăх
Пин тĕслĕ чечеклĕн çиçет.
Сире, çамрăксем — паттăр халăх,
Çапла ман калассăм килет:
— Тĕнчемĕр, туссем, пирĕн лайăх!
Хĕвеллĕ таса ун тӳпи.
Ан вăрçăр, ан чĕртĕр вут-кайăк —
Пурне те çитет кун çути.