Çу уйăхĕн 29-мĕшĕнче чăваш тата танлаштаруллă литература пĕлĕвĕн кафедринче куçăн уйрăмра 5 курсра, куçăн мар уйрăмра 6 курсра вĕренекенсен диплом ĕçĕсен ум хӳтĕлевĕ пулчĕ. Кăçал кафедрăра пурĕ 25 студент тĕрлĕ специальностьпе диплом ĕçĕ çырчĕ. Вĕсенчен 17 студент куçăм уйрăмра вĕренет, 8 студент куçăн мар уйрăмра. Чекушкина Е.П. доцент патĕнче хăйсен пултарулăх ĕçĕпе хӳтĕленекен тата журналистикăпа специализацине çӳренĕ студентсем диплом ĕçĕ çырчĕç. Пурĕ - 6 çын. Ермакова Г.А. профессор патĕнче «Литература пĕлĕвĕ» специализацине çӳрекен 2 студент хӳтĕленеççĕ. Федоров Ф.Ф. ассистент патĕнече «Музейпа архив ĕçĕ» специализацине çӳренĕ 6 студент хӳтĕленет. Ильина Г.Г. доцент 2 студента халăх сăмахлăхне пуçтаракан тĕпчевçĕсен пултарулăхĕ тарăх диплом ĕçĕ çыртарчĕ. Куçăн мар уйрăмра вĕренекен студентсем хăйсен диплом ĕçĕсене Абрамов В.А., Ильина Г.Г., Чекушкина Е.П., Владимимрова О.Г., Софронова И.В. доцентсем ертсе пынипе çырнă.

Пĕтĕмĕшле илсен, вĕренсе тухакан студентсен диплом ĕçĕсем аванах пулса тухнă. Рецензи çыртарман, текста тата литература списокне нормăпа килĕшӳллĕн йĕркеленмен студентсене çирĕп асăрхаттару турĕç, хӳтĕлев валли йĕркене кĕртсе çитерме сĕнчĕç. Дипломра усă курнă иллюстрацисене тата таблицăсемпе ӳкерчĕксене йĕркелесе çитермелли çинчен асăрхаттарчĕç.

Ильина Г.Г. доцент патĕнче «Н.И. Золотницкий – фольклорист» темăпа çырнă Т.В. Семенован ĕçне халлĕхе хӳтĕлеве кĕртмелле мар тесе йышанчĕç.

Куçăн мар уйрамра вĕренекен студентсен утă уйăхĕн 8-мĕшенче, куçăн уйрăмра вĕренекенсен утă уйăхĕн 10-мĕшĕнче диплом ĕçĕсен хӳтĕлевĕ пулать. Чăваш тата танлаштаруллă литература пĕлĕвĕн кафедринчен тухакан çамрăк фольклористсене, литература пĕлӳçисене, музееведсемпе архив ĕçченĕсене, пултарулăх ĕçĕпе ĕçлекенсене тата пулас журналистсене диплом хӳтĕлевĕнче ăнăçу сунатпăр. Пурин те лайăх паллăсем илмелле пултăр!!!

Хыпар çăлкуçĕ