Çĕрпӳ хулинче çулсерен утă уйăхĕн пĕрремĕш кану кунĕсенче ярмăркка ирттереççĕ — хулана республикăран кăна мар, Раççейĕн ытти тăрăхĕсенчен те хăнасем пухăнаççĕ. Кăçал та ку йăлана пăрахăçласшăн мар. Хăнасем умĕнче намăс курас мар тесе хула администрацийĕ ку мероприятине малтанах хатĕрленет — халăх кашни кун тенĕ пекех субботниксене тухать, хулан урамĕсене илем кӳртет. Хула урамĕсем те чылай тасалчĕç. ООО «Воддорстрой» ĕçченĕсем те юлмаççĕ — Никитинпа Совет урамĕсенче асфальт çулне юсаса тухрĕç.

Ярмаркка лапамĕнче те ĕç самай пулчĕ — курăка çăлса тухрĕç, тĕп сцена патне каякан çула тикĕслетрĕç. Тунтикун вара электричество çитерме тата тĕп хапхана вырнаçтарма палăртнă.

Мĕнех, утă уйăхĕн 2-мĕшĕпе 5-мĕшĕ хушшинче пире чăнах та чаплă уяв кĕтет пулас! Ярмăрккана килсе курма ан манăр! Çĕрпӳне çитме сире 103 автобус кирлĕ, маршруткисем те нумай çӳреççĕ.

Хыпар çăлкуçĕ: Çĕрпӳ районĕ