Ҫӗнтерӳ кунӗнче ырӑ йӑлана малалла тӑсӗҫ – ретро-троллейбус хула урамӗсемпе ҫула тухӗ. 1-мӗш маршрутпа ҫӳрекен транспорта 9-11 тата 14-17 сехетсенче ларма май пур.
Ретро-троллейбуса «Ӑслӑ транспорт» сарӑмра «Р» саспаллипе паллӑ тунӑ. Ӑна buscheb.ru сайтра та курма пулать.
ЗИУ-5 троллейбус рейса 1964 ҫулта пӗрремӗш хут ҫула тухнӑ. Ӑна 2019 ҫулта юсанӑ. Унтанпа ӑна уявсенче маршрута кӑлараҫҫӗ.
Ӗнер, ҫу уйӑхӗн 7-мӗшӗнче, Шупашкарти Трактор тӑвакансен культура керменӗнче «Река памяти» (чӑв. Астӑвӑм юханшывӗ) концерт пулчӗ. Ӑна Тӑван ҫӗршывӑн аслӑ вӑрҫинче ҫӗнтернӗренпе 79 ҫул ҫитнине халалланӑ.
Концертра вӑрҫӑ ҫулӗсенчи юрӑсем янӑрарӗҫ, илемлӗ хореографи композицийӗсем кӑтартрӗҫ.
Сцена ҫине «Суварята» халӑх ташшин ача-пӑча ансамблӗ, «ART NOVA» халӑх пултарулӑх студийӗ, «Этуаль» халӑх хореографи студийӗ, «Golden Flash» эстрада ташшин халӑх ансамблӗ, «Солнцеклеш» эстрада ташшин халӑх шкулӗ, «Тайны Востока» ташӑ шкулӗ, «Фантом» эстрада ташшин халӑх ансамблӗ, «Бэби-шлягер» вокал студийӗн халӑх эстрада студийӗ тухрӗҫ.
Чӗннӗ хӑнасем те пулчӗҫ: «Радость» ташӑ ансамблӗ, «Каприс» вокал ансамблӗ, «Мадригал» камера академи халӑх хорӗ.
Паянхи кун тӗлне пирӗн республикӑра Тӑван ҫӗршывӑн аслӑ вӑрҫине хутшӑннӑ 65 ветеран пурӑнать. Вӗсенчен чи асли – Етӗрнери Иван Ермолаев. Иван Васильевич кӑҫал 105 ҫултарӗ.
Вӑрҫа хутшӑннисен арӑмӗсем республикӑра — 968-ӑн; 2,5 пине яхӑн тыл ӗҫченӗ, концлагерсенче ачалла пулнӑ 26 ҫын, блокадӑри Ленинградра пурӑннисем 24-ӑн.
Хальхи вӑхӑтра хулари тӳре-шара вӑрҫӑ ветеранӗсене киле ҫитсе саламлать. Паян ӗҫ тата социаллӑ хӳтлӗх министрӗ Алена Елизарова тата Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӑн пуҫлӑхӗн тивӗҫӗсене пурнӑҫлакан Аркадий Скворцов Агриппина Янукович патӗнче пулнӑ.
Шупашкарти Чапаев музейӗ 1974 ҫулхи ҫу уйӑхӗн 9-мӗшӗнче уҫӑлнӑ. Вӑл хута кайнӑранпа 50 ҫул ҫитнӗ. Ыран музей юбилейне паллӑ тӑвать.
Уява Василий Чапаевӑн мӑнукӗн мӑнукӗ ҫемйипе пӗрле килӗ. Александр Чапаев музея парне парассине пӗлтернӗ. Вӑл кӗтмен парне пулӗ, ун пирки ҫу уйӑхӗн 8-мӗшӗнче кӑна паллӑ пулӗ. Ҫакна кӑна систернӗ: парне Василий Чапаевӑн аслӑ ывӑлӗпе Александр Чапаевпа, Тӑван ҫӗршывӑн Аслӑ вӑрҫипе ҫыхӑннӑ.
Сӑмах май, нумаях пулмасть Чапаев музейӗнче юсав тата реэкспозици тунӑ.
Шупашкарӑн 555 ҫулхи юбилейӗ тӗлне кӑларнӑ медальсене пама тытӑннӑ. Вӗсене Тӑван ҫӗршывӑн Аслӑ вӑрҫин ветеранӗсем тивӗҫнӗ. Медале 27 ветерана панӑ.
Вӗсен йышӗнче – Сӗнтӗрвӑрри округӗнче пурӑнакан 97-ри Аркадий Еремеев. Вӑл фронта 1944 ҫулта кайнӑ. Ҫӗрпӳ тӑрӑхӗнче пурӑнакан Георгий Александров та медале тивӗҫнӗ. Вӑл – 96 ҫулта. Михаил Сорокин ҫитес ҫул юпа уйӑхӗнче 100 ҫул тултарать. Вӑл 16 ҫулта чухне Сӑр тата Хусан хӳтӗлев чиккисене тунӑ ҫӗре хутшӑннӑ. Икӗ ҫултан ӑна ҫара илнӗ. Паттӑрлӑх кӑтартнӑшӑн Михаил Григорьевича II степень Тӑван ҫӗршыв вӑрҫин орденӗпе чысланӑ.
Ҫу уйӑхӗн 9-мӗшӗнче «Ҫӗнтерӳ ҫурти» акци иртӗ. Шупашкарта вӑл каҫхи 9 сехетре Петӗр Хусанкай ячӗллӗ культура керменӗ умӗнче пулӗ.
Ҫак акци Раҫҫейӗпех иртӗ. Йӑлана кӗнӗ тӑрӑх, Чӑваш Ен те унта хутшанӗ. Ҫӗнтерӳ кунӗнче ҫынсем Тӑван ҫӗршывӑн Аслӑ вӑрҫинче пуҫ хунӑ паттӑрсене асра тытса ҫурта ҫутӗҫ.
Ҫунакан ҫурта – хӑйне евӗр «астӑвӑм кӗперӗ». Вӑл иртнипе хальхине ҫыхӑнтарать, истори астӑвӑмне ӑруран ӑрӑва парасси пӗлтерӗшлӗ пулнине палӑртать.
Ҫӗнтерӳ кунӗ умӗн Шупашкарти вӑрҫӑ ветеранӗсене тата тыл ӗҫченӗсене киле ҫитсех саламлаҫҫӗ. Вӗсем патне ҫуекеннисем — Шупашкарти социаллӑ ӗҫченсем тата тӗрлӗ шайри тӳре-шара.
Уяв саламне тивӗҫнисен шутӗнче Шупашкарта пурӑнакан 102 ҫулти Елена Палейкина та пур. Хӗрлӗ Чутай районӗнчи Мишеркассинче ҫуралнӑскер вӑрҫӑ ҫулӗсенче те, кайран та тӑван колхозра ӗҫлесе ӗмӗрне ирттернӗ. Халӗ ватӑ ҫын хулара пурӑнать. Кинемей каласа кӑтартнӑ тӑрӑх, унӑн упӑшки, Фёдор Порфирьевич, Инҫет Хӗвелтухӑҫ фронтӗнчи ҫыхӑну полкӗнче пулнӑ. 1968 ҫулта арҫын пурнӑҫран уйрӑлса кайнӑ.
Шупашкарта пурӑнакан кинемее палламан ҫынсем ҫине-ҫинех улталанӑ. Вӑл вара вӗсене кашнинчех ӗненнӗ. Лешсем унран 1,5 миллион ытла тенкӗ сӑптӑрса илсен те хӑпман - шӑнкӑравласах тӑнӑ. Кинемей патне полицейскисем киле пырса ултавҫӑсем пирки ӑнлантарнӑ.
Пӗлтӗр кинемей инвестицисемпе ӗҫлесе илес тесе 150 пин куҫарса панӑ. Иккӗмӗш хутӗнче ун патне «банк ӗҫченӗ» шӑнкӑравланӑ, «хӑрушсӑр счет» ҫине 630 пин тенкӗ куҫарма ӳкӗте кӗртнӗ. Виҫӗ уйӑх каялла кинемее палламан ҫын 800 пин тенкине инвестицие хывма ӳкӗте кӗртнӗ. Ҫав укҫан пӗр пайне вӑл пӗлӗшӗнчен кивҫен илнӗ, тепӗр пайӗ - кредит.
Ултавҫӑсем ун патне шӑнкӑравлама пӑрахман. Хальхинче ӑна 1,5 милион тенкине тавӑрма тесе 100 пин тенкӗ ыйтнӑ.
Шупашкарта пурӑнакан темиҫе тӑлӑх тинех хваттерлӗ пулнӑ.
Вӗсем пурӑнмалли кӗтеслӗ пулассине 10 ҫула яхӑн кӗтнӗ.
Телеграмри «Чӑваш Ен калаҫать» каналта пӗлтернӗ, «тинех ӗнтӗ хваттер уҫҫисем пӗрин хыҫҫӑн тепри хӑйсен хуҫисене тупнӑ. 40 ҫын ӗмӗчӗ пурнӑҫланнӑ. Тӑлӑха тӑрса юлнӑскерсемшӗн Шупашкарти Геннадий Айхи проспектӗнчи 28-мӗш ҫурт тӑван кил пулса тӑнӑ».
Чӑваш Енри тӑлӑх ачасене хваттерпе тивӗҫтерес ӗҫ малалла пырать. Черетре тӑракансене кӑҫал 414 хваттер парӗҫ. Вӗсенчен 171-шне – Шупашкарта.
Ҫу уйӑхӗнчи уявсен тӗлӗнче Шупашкара Раҫҫей чемпионки Аделия Петросян килнӗ.
Хӗр Этери Тутберидзе командин турне хутшӑннӑ май пирӗн республикӑна килсе ҫитнӗ. Шоуна хутшӑнма килнӗскер хулапа паллашнӑ, кунти паллӑ вырӑнсемпе киленннӗ.
Хӑйӗн кӑмӑл-туйӑмӗпе фигуристка халӑх тетелӗнчи хӑйӗн страницинче паллаштарнӑ: «Шупашкар – хӑтлӑ та стильлӗ хула. Кунта урамсене тӗрлӗ вак-тӗвек илемлетет».
+1.3 °C