Ҫак эрнекун __Илле Иванова__ айӑпалкан судӑн черетлӗ ларӑвӗ иртнӗ — унта тинех __Эдуард Мочалов__ кӳнтелене ыйтса тӗпченӗ. Кун пирки Тимӗр Акташ журналист пӗлтерет. Допрос хальлӗхе кӗске мелпе ҫеҫ иртнӗ — «Сӗтев» хаҫатӑн редакторӗ «Покажи мне свой язык, и я скажу — кто ты» статьяна хӑй ҫырни пирки тепӗр хут пӗлтернӗ. Хӑй сӑмахӗнче вӑл хаҫатри нимӗнле статья та вӑл ирӗк памасӑр вырнаҫма пултарайманни пирки те каланӑ.

Малалла тӳре Илле Иванова хӑйне суд умне кӑларнӑ. Ӑна вара ытларах ыйтусем панӑ. Паллӑ журналист маларах каланӑ шухӑша ҫирӗплетнӗ — статья авторӗ вӑл мар. Илле Иванов хаҫат редактцийӗнчи ӗҫ епле йӗркеленни пирки каласа панӑ — ытларах чухне тӗп редактор панӑ ӗҫпе килӗшӳллӗн редакци журналисчӗ тепӗр авторӑн сӑмахӗсемпе тезисӗсене ҫырса ҫеҫ хурать. Журналист текста хатӗрлет, тӳрлетет, анчах ку ӗҫ ӑна статья авторӗ пулма май памасть.

Илее Иванов статья экстремислӑ марри пирки те палӑртнӑ. Унта, имӗш, __чӑвашлӑхшӑх__ хытӑ пӑшӑрханаканӑн чӑваш ҫыннин шухӑшӗсем вырнаҫнӑ. Эдурад Мочалов вара шӑп та шай ҫавнашкал ҫын. Хирӗҫтерӳ ҫуратакан вырӑнсем те ҫук. Статьяра демократиллӗ обществӑри йӗркене пӑсакан пулӑмсене хирӗҫлени ҫеҫ пур. Редакци ушкӑнӗ те саккунсене пӑсаканни мар. Статьяри хӑш-пӗр вырӑнсене ҫивӗчрех вырӑнсем пурри пирки палӑртнӑ Илле Иванов, анчах вӗсенче историллӗ фактсене илсе кӑтартни ҫеҫ пур имӗш. «Покажи мне свой язык, и я скажу — кто ты» статьяра __Николай Фёдоров__ пирки ырӑ мар сӑмахсем каланине Илле Арсентьевич лешӗ президентра ларнӑ вӑхӑтра Эдуард Мочаловӑн агрофирмине турса илнипе сӑлтавланӑ, ҫавӑнпа та автор ӑна вӑйлӑ тустарнӑ та имӗш.

«Статьяна экстремислӑ пулнине сӳтсе явнӑ-и эсир Мочаловпа?» — ыйтсан Илле Иванов хирӗҫлемен, анчах калаҫу ҫак айӑплава тӳрре кӑларассине Европӑри ҫын прависене хӳтӗлекен суда ҫитересси пирки пынӑ тесе ӗнентернӗ.

Тӑхтав хыҫҫӑн Н. Столбов ваккат суд ӗҫ хучӗсем ҫумне __/news/3985.html|«Чӑваш Республикин ятлӑ-сумлӑ ҫыннисем И.Иванова хӳтӗлесе ҫырнӑ уҫӑ ҫырӑва»__ хушма сӗннӗ. Ӑсчахсемпе культура ҫыннисем алӑ пуснӑ хута тӳре йышӑннӑ. Николай Столбов ҫавӑн пекех __Атнер Петрович Хусанкай__ хатӗрленӗ айӑпланакан статьян тишкерӗвне ӗҫ хучӗсем ҫумне хушма ыйтнӑ — кунпа тӳре вара килӗшмен.

Тепӗр лару юнкун, авӑнӑн 25-мӗшӗнче, иртмелле.