Паян __Чӑваш патшалӑх академи драма театрӗ__ черетлӗ хут чаршав уҫрӗ. Юлашки ҫулсенче ҫирӗп йӑлана кӗнӗ пекех кӑҫал та театрӑн сезонӗ Федор Павловӑн «Ялта» спектаклӗпе уҫӑлчӗ.

«Ывӑнтарчӗҫ ӗнтӗ унпа пӗр вӗҫӗм уҫса-хупса», — текенсем те пуррине пӗлсе тӑнӑран хамӑн та ҫапла шухӑшлас кӑмӑл малтанланса амалланнине пытарам мар. Анчах залра ҫутӑ сӳнет те «Ҫич уй урлӑ ҫул курнать — эпир каяс ҫул мар-ши?» — тени янӑраса каять те вилӗмсӗр «Ялта» драмӑпа пуҫласа тӗрӗсех тунине ӑнланса илетӗн. Ҫапла. Классика классиках ҫав ӗнтӗ. Тарӑн шухӑшлӑ хайлав ҫумне артистсен вӑййине, тумтирӗпе стенӑна епле илемлетнине, юрри-ташшине, ҫутӑ вылявне кӗрт те тек нимӗн те хушса калаймӑн.

Спекталкь пуҫланас умӗн куракансен умне театрӑн илемлӗх ертӳҫи __Валерий Яковлев__ сцена ҫине тухрӗ. Вӑл кӑҫалхи ҫӗнӗ сезонти плансемпе паллаштарчӗ. Ун пирки эпир __/news/3798.html|маларах пӗлтернӗччӗ__. Ҫӗнӗрен ҫакна кӑна хушса калас: «Сутӑн илнӗ чыс» премьерӑпа театр куракансене ҫак уйӑхрах, 17-мӗшӗнче, савӑнтарӗ. Ытти шухӑш-тӗллев пирки эпир сире маларах пӗлтернине кура тепӗр хутчен асӑнмӑпӑр.

Кӑҫал туса ирттернине илес тӗк, авӑн уйӑхӗнче театр Мускава икӗ кунлӑх гастроле кайса килнӗ. Иртнӗ ӗмӗрӗн 70–80-мӗш ҫулӗсенче икшер-виҫшер эрне те пулнӑ та, анчах халӗ апла ҫӳреме йывӑр — укҫа-тенкӗ самай кирлӗ. Юрать-ха, республика хыснинчен «кӗмӗл» уйӑрнӑ, тепӗр пайне пуянсем пулӑшнӑ. Екатеринбургра иртнӗ Пӗтӗм тӗнчери театр фестивальне ҫитсе килме те вӗсем тӗкӗ кӳнӗ.