__Чӑваш наци конгресӗн__ Аслӑ пухӑвӗ умӗн шутлӑ кунсем ҫеҫ юлчӗҫ. Ку мероприятие чылайӑшӗ ҫине тӑрсах хатӗрленет тесен те йӑнӑш пулмӗ — тӗрлӗ __/news/4235.html|умпухусемпе__ ҫавра сӗтелсем иртеҫҫӗ, __/news/4233.html|ЧНК-ан сайтне__ хута яраҫҫӗ. Президиум та ал усса лармасть темелле — тӑтӑшах пуҫтарӑнаҫҫӗ. Ӗнер вара ЧНК пресс-конференци ирттернӗ, унта тӗрлӗ телеканалсемпе МИХсен журналисчӗсем пухӑннӑ. Ыйтусем ҫине Константин Портновпа Михаил Краснов хуравланӑ.

Журналҫӑсемпе тӗлпулу епле иртни пирки Тимӗр Акташ журналист каласа пачӗ. Ыйтусем сахал мар пулнӑ. «Сӑвар ТВ» журналисчӗ, сӑмахран, хальхи вӑхатра мӗнле кандидатсем пурри пирки ыйтнӑ. Михаил Краснов хӑйӗн хуравӗнче Президента съезд суйласси пирки ҫеҫ каланӑ. Унсӑр пуҫне Олег Цыпленков («Сӑвар ТВ») 2010 ҫулхи халӑх ҫыравӗн пӗтӗмлетӗвӗ пирки те, наци лицейӗн шӑпи пирки те, наци телекуравӗн пуҫлӑхне суйлама пултарайманни пирки те ыйтусем панӑ — Михаил Краснов нихӑш ыйту ҫине те тӗплӗ хурав парайман, унчченех паллӑ информацие ҫеҫ пӗлтерме пултарнӑ. Константин Портнов ҫеҫ хӑйӗн хуравӗнче наци телекуравӗнчи чӑваш чӗлхи шайӗ конгреса тивӗҫтерменни пирки каланӑ, Аслӑ пухура кун пирки резолюци йышӑнмалли ҫинчен пӗлтернӗ.

Съезда делегатсене епле майпа суйлани пирки ыйту парсан Михаил Краснов тӗрлӗ тӑрӑхсенчен вӗсен шутне чӑвашсен йышне кура тата кам лайӑхрах ӗҫленине кура палӑртни пирки каланӑ. Мӗнле пӗрлешӳсенчен чӗнессине вара малтан иртнӗ Мӑн Канашра пӑхса тухнӑ иккен.

Пресс-конференцире ҫавӑн пекех кама сӑмах парасси пирки, хӑш-пӗр организацисенчен делегата тухайманни пирки, Н. Лукиановӑн Уҫӑ ҫырӑвне, нумай пулмасть иртнӗ умпухура йышӑннӑ протокол пирки, Аслӑ Пухӑва епле майпа лекме пултарасси пирки ыйтусем пулнӑ. Калаҫу пурӗ сехет те 10 минут патнелле тӑсӑлнӑ.