Нумаях пулмасть республикӑн сывлӑх сыхлавӗн министрӗ Алла Самойловӑпа иртнӗ брифингра хаксем пирки ыйту хускатнӑ. «Тӳлевлӗ медицина пулӑшӑвӗ кӳресси вӑйлӑ хакланнӑ теме иртерех», — тенӗ унта Алла Самойлова.

Иртнӗ ҫулхи раштаврипе танлаштарсан иртнӗ уйӑхра массаж хакӗ унчченхинчен 54,4 процент чухлӗ хакланса кайнӑ. Шӑл кӑларма та йӳнӗ мар — асӑннӑ тапхӑртинчен халӗ 42,3 процент ытларах кӑларса хума тивет. Физиотерапи процедурисемшӗн унчченхинчен чӗрӗк процент таран нумайрах тӑкакланмалла, вар-хырӑма ультрасасӑпа тӗрӗслеттерес тесен 32 процент ытларах ыйтаҫҫӗ. Специалистсем патне малтанхи йышӑнӑва каяс тесен кӗсье ҫӳхе пулмалла мар — хаксем 14,5 процент хӑпарнӑ, пӗтӗмӗшле юн анализне пӗлес тесен 11,8 процент хаклӑрах тӳлемелле.

Тӳлевлӗ медицина пулӑшӑвӗ кӳрессин хакӗ хӑпарнӑ пулин те, Чӑваш Енӗн сывлӑх сыхлав министрӗ каланӑ тӑрӑх, вӑл Атӑлҫи федераци округӗнче чи йӳннисенчен пӗри-мӗн. Кунсӑр пуҫне Алла Самойлова ытти регионта юлашки 5–6 ҫул хушшинче хаксене пӗрре кӑна мар ӳстернине, пирӗн патра юлашки вунӑ ҫулта пӗр пек тӑнине ӗнентернӗ.

Сӑмаха ҫирӗплетме уйрӑм процедурӑсен хакӗсене илсе кӑтартнӑ. Сӑмахран, массаж 60 тенкӗ тӑнӑ, халӗ ӑна 90 тенке ҫитернӗ. Хак пӗрре-виҫҫӗмӗш пайӗ чухлӗ хӑпарнӑ пулин те пирӗн республикӑра массаж тутарма Атӑлҫи тӑрӑхӗнчинчен чи йӳнни-мӗн. Чулхула облаҫӗнчех, сӑмах май, уншӑн кӗсьене 272,6 тенкӗ чухлӗ ҫӳхетмелле иккен. Юнӑн пӑтӗмӗшле анализне пӗлес тесен те, специалитсем патне малтанхи хут лекес тесен те пирӗн патра чи йӳнни иккен.

Тӳлевлӗ пулӑшупа усӑ куракансем пирӗн республикӑра сахаллине те палӑртса хӑварнӑ. Патшалӑх пульницисене пыракансенчен 5 проценчӗ кӑна тӳлевлӗ майпа тӗрӗсленет е сипленет иккен. Асӑннӑ учрежденисенче укҫа кӑларса хунинчен чылай пайӗ, 60 проценчӗ, шӑл юсаттарассипе ҫыхӑннӑ.