Ҫак вӑхӑтра Куславкка тӑрӑхӗнчи __/news/4611.html|Энтри Пасар шкулӗ__ ҫеҫ мар 100 ҫулхи юбилейне палӑртнӑ. Кӗҫ-вӗҫ ҫавраҫул тултарнине __Комсомольски районӗнчи__ __Мӑрат__ шкулӗ те уявламалла.

Ку шкула 1913 ҫулта Герасимов Никита Герасимович пуҫарӑвӗпе уҫнӑ, вӑл малтанлӑха Афанасий Горшков ҫуртӗнче вырнаҫнӑ. Нумай вӗрентеймен ҫав вӑл, часах хупӑннӑ. 1918 ҫулта ҫеҫ вара ҫӗнӗрен чӗрӗлнӗ. Ун чухне те вӗренӳ уйрӑм ҫын ҫурчӗсенче иртнӗ. Пӗрремӗш шкул ҫуртне 1930 ҫулта хута янӑ — халь унта историпе таврапӗлӳ музейӗ вырнаҫнӑ. Вӑл вӑхӑтра ҫак шкула таврари ачасем те ҫӳренӗ — __Шурутран__, __Кармалтан__, __Тукайран__. 1934 ҫулта ӑна тулли мар вӑтам шкул шайне хӑпартнӑ. 1959 ҫултанпа вӑл сакӑр клас вӗренмелли шкул шутланнӑ. 1984 ҫулхи утӑ уйӑхӗн 22-мӗшӗнче ЧАССР Министрсен Кабинечӗ хушӑвӗпе вӑл вӑтам шкул пулса тӑнӑ.

Хальхи вӑхӑтра шкулта 143 ача вӗренет. Кунта 20 вӗренӳ пӳлӗмӗ, спортзал, акт залӗ, 80 ача лармалӑх апатлану пӳлӗмӗ, компьютер класӗ пур. Ҫавӑн пекех шкулта тренажерсен пӳлӗмӗ те, ӑсталӑх лаҫҫи те, медицина пӳлӗмӗ те пур. Шкул вулавӑшӗнче 3500 ытла вӗренӳ кӗнеки, 11 пине яхӑн илемлӗ литература, 2 пин ытла меслетлӗх кӗнекисем.

Шел те, Тукай ял тӑрӑхӗн сайчӗ, уява хӑҫан палӑртасси пирки пӗлтермест. Ҫавах та, енчен те эсир унта кайса килес шухӑшлӑ пулсан, вӗсен сайтне кӗрсе пӑхкалӑр — тен, кунне калӗҫ те.