Кӑрлачӑн 27-мӗшӗнче __Йӗпреҫ районӗнчи__ __Пучинкери__ вӑтам шкулта шахмат турнирӗ иртрӗ. Ӑна __Пучинке__ ялӗнчи «Красный партизан» (чӑв. ~~Хӗрлӗ партизан~~) колхоз хуҫалӑхне 28 ҫул ертсе пынӑ Андреев Гурий Андреевича халалласа ирттерчӗҫ. Турнира йӗркелесе пуҫарса яраканӗ тата спонсорӗ — Владимир Гурьевич усламҫӑ, Гурий Андреевичӑн ывӑлӗ. Хальхи вӑхӑтра вӑл ҫӗршывӑн тӗп хулинче, Мускавра, ӗҫлесе пурӑнать, «Аратрика» стройфирмӑн тӗп директорӗ.

Пӗрремӗш хут ҫак турнир Гурий Андреевич ҫуралнӑранпа 80 ҫул ҫитнине халалласа 2012 ҫулхи кӑрлачӑн 28-мӗшӗнче иртнӗ. Унта Йӗпреҫ поселокӗнчи шахмат клубӗн членӗсем тата __Пучинке ял тӑрӑхӗнчи__ ҫак вӑййа кӑмӑллакансемпе шкулта вӗренекенсем хутшӑннӑ.

Кӑҫалхипе виҫҫӗмӗш хут иртекен турнира Владимир Гурьевич хӑй вӗренсе тухнӑ тата ӗҫленӗ тӑван шкулӗнче ирттерме палӑртнӑ. Паян ӑмӑртура 40 ытла вӗренекен ҫӗнтерӳҫӗ ятне илме тупӑшрӗ. Судья тивӗҫне Гурий Андреевич мӑнукӗ, Андреев Андрей, И.Н.Ульянов ячӗллӗ Чӑваш Патшалӑх Университечӗн энергетикӑпа электротехника факультечӗн 5 курс студенчӗ чыслӑн пурнӑҫларӗ.

Турнира хутшӑнакансене ҫула кура 2 ушкӑна пайласа палӑртрӗҫ, пӗтӗмлетӗвӗ ҫакӑн пек пулчӗ:

**1-4 классем хушшинче**:

1 вырӑн — Васильев Андрей, 3 «б» класс

2 вырӑн — Краснов Кирилл, 3 «б» класс

3 вырӑн — Иванов Андрей, 4 класс

**5-11 классем хушшинче**:

1 вырӑн — Павлов Владислав, 9 класс

2 вырӑн — Васильев Максим, 11 класс

3 вырӑн — Белов Сергей, 7 класс

Андреев Владимир Гурьевич ҫӗнтерӳҫӗсене саламларӗ, дипломсемпе тата парнесемпе чысларӗ, Пучинке шкулӗн администрацине турнира ирттерме пулӑшнӑшӑн тав сӑмахӗ каларӗ.