Хӗрлӗ Чутай районӗнче «Прикоснись к олимпиаде» (чӑв. «Олимпиадӑпа лайӑхрах паллаш») акци малалла пырать. Иртнӗ эрнере район ҫамрӑкӗсем Олимп ҫулӑмӗн эстафетине хутшӑнса факел йӑтса курнӑ паллӑ спортсменсемпе — XXV-мӗш Олимп вӑййисене хутшӑннӑ Алина Ивановӑпа тата XXVI-мӗш Олимп вӑййисене хутшӑннӑ Елена Грузиновӑпа тӗл пулчӗҫ, Олимпиада символӗпе паллашрӗҫ.

Паян Олимп факелне районти вӑрман урлӑ вырнаҫнӑ шкулсене илсе ҫитерчӗҫ. Унта пурӗ 4 шкул вырнаҫнӑ: __Хусанушкӑнь__, __Тури Ҫӗрпӳкасси__, __Ҫӗнӗ Атикасси__ тата __Штанаш__ шкулӗсем. Олимп символне район администраторӗн ҫумӗ, вӗренӳ пайӗн пуҫлӑхӗ Алексей Юрьевич Порфирьев, Хӗрлӗ Чутайри «Хастар» спорт комплексӗн директорӗ Вячеслав Витальевич Дадюков тата вӗренӳ пайӗн информаци енӗпе ӗҫлекен Александр Владимирович Храмов чи малтанах районти аякри шкула — Штанаш шкулне — илсе ҫитерчӗҫ. Сӑлтавӗ те паллӑ — ҫак шкул ачисем Сатлайкин Иван Иванович вӗрентекен ертсе пынипе яланах спортра хӑйсене хастар кӑтартҫҫӗ, малти вырӑнсене йышӑнаҫҫӗ (Иван Сатлайкинӑн хӑйӗн те медальсен шучӗ чылай).

Алексей Порфирьев шкул ачисене Олимп вӑййисен кун-ҫулӗпе кӗскен паллаштарчӗ, Вячеслав Дадюков Олимп символне шкулти спортсмена Дмитрий Ишмейкина тыттарчӗ. Алран-алла куҫса факел кашни вӗренекен аллинчех пулса курчӗ. Юлашкинчен кашни класс, пӗрле те, уйрӑмшарӑн таҫак ҫункӑҫа алла тытса асӑнмалӑх сӑн ӳкерӗнчӗ. Унтан Олимп символӗ кӳршӗри шкула — Ҫӗнӗ Атикассине — ҫул тытрӗ. Штанаш шкул ачисемпе вӗрентекенсем ӑна ӑсатнӑ хыҫҫӑн «Хаваслӑ старт» тата воллейбол вӑййисем выляма спортзала васкарӗҫ.

«Хаваслӑ старт» малтан кӗҫӗн класра вӗренекен шкул ачисем хушшинче, унтан 5–9-мӗш класра пӗлӳ пухакансемпе шкулти вӗрентекенсем хушшинче хастар иртрӗҫ. Учительсен чысне Светлана Соловьева, Алина Осеева, Марина Чучакова тата Иван Сатлайкин хӳтӗлерӗҫ. Тӑххӑрмӗшсем чемпион ятне тивӗҫрӗҫ, вӗрентекенсем — 2-мӗш вырӑнта, виҫҫӗмӗшсем — ҫиччӗмӗшсем.