Анӑҫри хӑш-пӗр журналист Крымри референдумра сӑтӑр тума тӑрӑшни пирки информаци агентствисенчен пӗрне, «Новости» РИАна, Финлянди сӑнавҫи Йохан Бекман пӗлтернӗ.

«Кунта анӑҫри журналист питӗ нумай, анчах, шел те, вӗсем хӑшӗсем референдума хирӗҫле вӑрттӑн вӑйпа усӑ кураҫҫӗ. Эп асӑрханӑ тӑрӑх, вӗсенчен хӑшӗсем суйлав участокӗсен ӗҫченӗсене психологи тӗлӗшӗнчен пусараҫҫӗ», — тенӗ вӑл.

Йохан Бекман шучӗпе ҫакӑ ятарлӑ операци те пулма пултарать. «Вӗсем суйлав комиссийӗсен пайташӗсене тӗлӗнмелле ыйтусем параҫҫӗ. Ҫакна эп, сӑмах май, Раҫҫейре дума тата Президент суйлавӗ иртнӗ чух та сиснӗччӗ», — пӗлтернӗ Финлянди сӑнавҫи.

Крымри референдумра витӗр курӑнакан урнӑсем усӑ курнине анӑҫри хӑш-пӗр журналист суйлав вӑрттӑнлӑхне уҫӑмлатнипе танлаштарать-мӗн. «Тӗрӗссипе, витӗр курӑнакан урна суйлав уҫӑмлӑ пынине пӗлтерет», — тенӗ маларах асӑннӑ сӑнавҫӑ.

Бекман унӑн ентешӗ, финн журналисчӗ, Бахчисарайри суйлав комиссийӗн пайташне, урна патӗнче тӑракан хӗре, «Сана кунта кам ирӗксӗр янӑ?» йышши ыйтупа тапӑннӑ. Хӗр ыйтусене хуравлама килӗшмен енне ун пирки вӑл хӑраса та шикленсе ӳкнӗскер тесе пӗтӗмлетнӗ.

Анӑҫри пресса халӗ вырӑссене хирӗҫле пӗлтерет-мӗн — унта та кунта ҫар тӑрать тесе пӗлтерет иккен. Анчах финн сӑнавҫи апла мар тесе ӗнентернӗ. Суйлавҫӑсем хастаррӑн сасӑлаҫҫӗ иккен, лару-тӑру лӑпкӑ.

Аса илтеретпӗр, паян Крымра тата Севастопольте рсепублика статусне палӑртмалли суйлав иртет. Унта хутшӑнакансен икӗ ыйтуран пӗрне: «Крыма эсир федераци субьекчӗ евӗр Раҫҫейпе пӗрлештересшӗн-и?» е «Крым Республикин 1992 ҫулхи Конституцине чӗртсе тӑратса Крыма Украина пайӗ евӗр пултарасшӑн-и?» суйламалла. Хӑшӗшӗн ытларах сасӑлаҫҫӗ, ҫав варианчӗ ҫӗнтерет.

Ҫав вӑхӑтрах ку референдума анӑҫра йышӑнмаҫҫӗ — ку ӗҫе ирттерсе Раҫҫей тепӗр патшалӑхӑн ҫӗрне туртса илет иккен. Ҫавна май тӗрлӗ санкцисем хатӗрлеҫҫӗ. Крым ҫурутравӗнчи «ирӗклӗ хӳтӗлевҫӗсем» Раҫҫей салтакӗсем пулнишӗн пӗрре те иккеленмеҫҫӗ.

Мускав вӑхӑчӗпе 19 сехет тӗлне суйлавҫӑсен 70 проценчӗ референдума хутшӑннӑ. Суйлав участокӗсем Мускав вӑхӑчӗпе 22 сехетре (Крымра вӑл вӑхӑтра каҫхи саккӑр пулӗ) хупӑнӗҫ.