Пӗтӗмлетӗве правительство ларӑвӗнче ирттернӗ. Чӑваш Енӗн усламҫисен хӳтӗлевҫи Владимир Иванов иртнӗ ҫул унтан 54 ҫын пулӑшу ыйтнине пӗлтернӗ. «Кашни ҫӑхав хыҫне пысӑк ыйту пытарӑннӑ, ансат та ҫӑмӑл ыйтусем пирӗн пата килмен», — тенӗ вӑл. Кӑҫалхи кӑрлач-нарӑс уйӑхӗсенче 40-е яхӑн ыйту килнӗ те иккен. Пӗлтӗрхисене илсен, вӗсенчен ҫуррине яхӑнӗнче ҫӗр хутшӑнӑвӗсемпе ҫыхӑннӑ ыйтусем усламҫӑсен хӳтӗлевҫинче хӳтлӗх шырама хистенӗ. Сӑмахран, 10 ҫул тара илсе пурӑннӑ хыҫҫӑн усламҫӑ ҫӗр лаптӑкӗсӗр тӑрса юлни кӑмӑллах мар. Ҫапла ыйтупа усламҫӑ патне пысӑк строительство фирми тухнӑ. Вӑл ҫынсене пурӑнма ярса ӗлкӗрнӗ иккен, коммуникацисене туса пӗтернӗ-мӗн, анчах палӑртнӑ территорие туса пӗтереймен. Шучӗпе ҫав лаптӑка аукцион урлӑ илме юрать. Анчах 10 ҫултан ҫӗр сана лекессипе лекмессине пӗлсе тӑни услаҫӑсене лӑпкӑн ӗҫлеме кансӗрлет тесе шухӑшланине палӑртнӑ Владимир Иванов.

Чӑваш Ен Элтеперӗ __Михаил Игнатьев__ кашни тӗслӗхпе обьективлӑ тата субьективлӑ факторсене тӗпе хумаллине палӑртса хӑварнӑ. Хӑшӗсем ҫӗре бизнеса аталантарма мар, кайран сутса яма туянаҫҫӗ-мӗн.

Иванов гражданла право хутшӑнӑвӗсем хӑш чух пуҫиллисене куҫни пирки те асӑнса тӑнӑ. Сӑмахран, пӗр усламҫӑ банкран кредит илнӗ, анчах супермаркетсен конкуренцине чӑтайман. Банкирсен умӗнче парӑмӗ юлнӑ. Лару-тӑрӑва гражданла право мелӗпе хаклас вырӑнне улталама хӑтланнӑ тесе ҫынна пиллӗк ҫуллӑха хупса хунӑ иккен. «Тӗрмере ларнипе вӑл пӗрех укҫана тавӑрса параяс ҫук», — тенӗ усламҫӑсен хӳтӗлевҫи. «Кун пек чух усламҫӑсене тухӑҫлӑрах хӳтӗлемелле», — килӗшнӗ Михаил Игнатьев.

Ларура ытти ыйтӑва та сӳтсе явнӑ.