Чӑваш Ен экономики епле аталаннине тишкерсе пыракансем икӗ пулӑма асӑрхамасӑр ирттермерӗҫех-тӗр.

Пӗрремӗшӗнчен, пушӑн 20-мӗшӗнче иртнӗ Патшалӑх Канашӗн сессийӗнче __Михаил Игнатьев__ Элтепер республикӑн иртнӗ ҫулхи ӗҫ-хӗлне пӗтӗмлетрӗ. Докладра вӑл социаллӑ мӗнпур яваплӑха пурнӑҫлама пултарнине, Пӗтӗм тӗнчери «Moody's» тата «Fitch» кредит агентствисем Чӑваш Ене лайӑх енчен палӑртнине, халӑх влаҫа ытларах шаннине, ҫурт-йӗр тӑвасси тата ача ҫуратасси ӳснине палӑртса хӑварчӗ. Отчетпа тӗплӗн паллашас тесен __http://www.cap.ru/SiteMap.aspx?gov_id=712&id=1746775|ҫак каҫӑпа__ пӑхмалла.

Ӗнер вара Экономика канашӗн ларӑвӗ иртрӗ. Унта Чӑваш Енӗн социаллӑ пурнӑҫӗпе экономикин 2030 ҫулчченхи стратегине пӑхса тухнӑ. ЧР экономика министрӗ Владимир Аврелькин шучӗпе влаҫ органӗсен тӑрӑшнине кура бизнеса аталантарма Чӑваш Енре тӑнӑҫлӑ лару-тӑру йӗркеленмелле.

Экономика канашӗн ларӑвне хутшӑннӑ пысӑк пердпритяи ертӳҫисем, экспертсем стратегие кӗртме тӗрлӗ сӗнӳ панӑ. Раҫҫейӗн халӑх хуҫалӑхӗн Халӑхсем хушшинчи агробизнесӗн центрӗн ертӳҫин Виктор Лищенко шучӗпе Чӑваш Енри ялсенче инженери тата транспорт инфраструктури лайӑх аталаннӑ. Ҫак майпа тивӗҫлипе усӑ курсан ял хуҫалӑх продукцине туса илессине ӳстерме пулать. Пысӑк предприятисенчен пӗрин шучӗпе ҫамрӑксене ӗҫе хӑнӑхтарассипе, тӗрӗсрех, вӗсенчен экономика валли кадрсем хатӗрлессипе ҫине тӑмалла. Тепри вара Стратегире тӗп тесе палӑртнӑ электротехникӑна кӑна мар, апат-ҫимӗҫ промышленноҫне те шутран кӑларса пӑрахмалла мар тесе каланӑ.

15 ҫултан епле аталанассине палӑртаҫҫӗ-ха, паян туса ирттермелли пирки пуҫ ватмаҫҫӗ-шим тесе шухӑшлакансем те, тен, пулӗҫ-ха. Анчах ытти регионта кӑна мар, ҫӗршывра та малашлӑхлӑ планпа пурӑннине манамалла мар-тӑр…