__Красноармейски районӗнчи__ __Тусай__ ялӗнче ҫуралса ӳснӗ Александров Вячеслав Александрович (1929–2005) ӗҫ ветеранӗ пурнӑҫне ҫӗр ӗҫне халалланӑ. Ял хуҫалӑх институтӗнчен вӗренсе тухнӑ хыҫҫӑн малтанах Тинӗсҫум енӗнчи Чкаловскире агрономра тӑрӑшнӑ, унтан __Етӗрне районӗнчи__ __Кӑкшӑм__ ялӗнче агрономра ӗҫлеме пуҫланӑ. 1955–1989 ҫулсенче колхозра агроном, унтан тӗп агроном, юлашки 17 ҫулне «Заветы Ильича» колхоз председателӗ пулса ӗҫленӗ.

Тӑрӑшулӑхне кура ӑна «Чӑваш АССРӗн тава тивӗҫлӗ агрономӗ» тата «РСФСР тава тивӗҫлӗ агрономӗ» ятсем парса чысланӑ, темиҫе орден, чылай медаль парса наградӑланӑ, вӑл Халӑх хуҫалӑхӗн Пӗтӗм Союзри куравне хутшӑнса ылтӑн тата кӗмӗл медальсене те тивӗҫнӗ. Вячеслав Александровича коллектив «Хисеплӗ колхозник» тата «Хисеплӗ председатель» ят парса чысланӑ.

Вырӑнти администраци ертсе пынипе ӑна асра тытса ҫулленех ҫамрӑксем хушшинче теннис вӑййисем ирттереҫҫӗ. Кӑҫал та Кӑкшӑмри шкулӑн спортзалӗнче черетлӗ ӑмӑртусем иртрӗҫ. Кӑкшӑм ял тӑрӑхӗн пуҫлӑхӗ Константин Михайлов, шкул вӗрентекенӗсем, Александров тӑванӗсем пухӑннисене ӑмӑртура ӑнӑҫусем сунчӗҫ.

Теннис вылякансем ҫулӗсене кура темиҫе ушкӑна пайланнӑ: 4–5-мӗш, 6–7-мӗш тата 8–9-мӗш класс хастарӗсем. Ҫӗнтерӳҫӗ ятне 7-мӗш класра вӗренекен Костя Ильин тата 8-мӗш класра вӗренекен Миша Жандаров, хӗрачасенчен 8-мӗшӗнчи Кристина Григорьевӑпа 7-мӗш класри Марина Тимофеева тивӗҫрӗҫ. Аслисене илес пулсан 1-мӗш вырӑнта __Пӑчанар__ ялӗнчи Иванов Зиновий тата ҫак ялти Надежда Пчелкина мала тухрӗҫ.

Константин Михайлов 1–3-мӗш вырӑнсене йышӑннисене Хисеп хучӗсемпе тата асӑнмалӑх парнесемпе чысларӗ. Александров Вячеслав Александровича асра тытнӑшӑн унӑн хӗрӗсемпе-ывӑлӗсем, кинӗ-кӗрӳшӗсем ял администраци пуҫлӑхне Константин Михайлова, шкул коллективне, ял халӑхне, колхоз ӗҫченӗсене чунтан тав тӑваҫҫӗ.