Ҫеҫпӗл Мишши ячӗллӗ Чӑваш патшалӑх ҫамрӑксен театрӗ Чӑваш чӗлхин эрнипе килӗшӳллӗн республикӑри район-хулара наци постановкисене лартать.

Нумаях пулмасть __Иосиф Трерӑн__ «Чӗрӗ сӑмах» ревю __Тутарстанри__ __Ҫӗпрел районӗнче__ тата республикӑри __Элӗк районӗнче__ пулнӑ. Постановкӑна Чӑваш Ен Элтеперӗн грантне илмешкӗн тӑратнӑ. Спектакле курнӑ хыҫҫӑн Иосиф Дмитриев режиссер, театр артисчӗсем, Чӑваш Республикинчи аслӑ шкулсен преподавателӗсем районти шкулсенче чӑваш чӗлхипе литературине вӗрентекенсемпе тӗл пулнӑ, вӗренӳ, ҫамрӑксемпе ачасем хушшинче чӗлхене сарас ыйтӑва сӳтсе явнӑ.

Учительсем каланӑ тӑрӑх, наци спектаклӗсене кӑтартни лайӑх витӗм кӳрет. «Чӗрӗ сӑмах» постановкӑна вӗсем хӑйне евӗр вӗренӳ пособийӗ тесе палӑртнӑ. Унӑн чӗлхи ҫӑмӑл, вӑл чӑваш халӑхӗн историйӗпе паллаштарать.

Спектакль — чӑваш поэзийӗн сӑнӗ. Кунта Ҫеҫпӗл Мишшин, Геннадий Айхин, Петӗр Хусанкайӑн, Митта Ваҫлейӗн сӑввисем янӑраҫҫӗ. Авторсен хайлавӗсенче чӑваш халӑхӗн йӑли-йӗрки, савӑнӑҫӗпе хуйхи сӑнланнӑ. Фильм кадрӗсем, сӑнӳкерчӗксен хроники, кӗвӗ иртнӗ пурнӑҫа илсе ҫитерет. Пӗрремӗш планра — Поэт сӑнарӗ. Вӑл ӗмӗрти пулӑмсем пирки пӑшӑрханать.

Ака уйӑхӗн 21-мӗшӗнче XX ӗмӗр поэзин историйӗпе __Ҫӗмӗрле__ хулин ачисем паллашнӑ. Канаш, __Патӑрьел районӗсенче__ те анлӑ мероприяти ирттерме палӑртнӑ. Мӗншӗн унта-ха? Кунта чӑваш поэзийӗн классикӗсем Ҫеҫпӗл Мишши (Канаш районӗнчи Ҫеҫпӗл ялӗ), Митта Ваҫлейӗ (Патӑрьел районӗнчи Аслӑ Арапуҫ ялӗ), Геннадий Айхи (Патӑрьел районӗнчи Ҫӗньял ялӗ). Паян Ҫамрӑксен театрӗнче П.Осиповӑн «Айтар» спектаклӗ пулӗ. Акан 26-мӗшӗнче __Юхма Мишшин__ «Пюрнескепе унӑн тусӗсем» постановкӑна лартӗҫ.