Чӑваш Ене Раҫҫейӗн Ял хуҫалӑх министерствин ӳсентӑран департаменчӗн директорӗ Петр Чекмарев ҫу уйӑхӗн 8-мӗшӗнче килсен республикӑна ял хуҫалӑх енӗпе хытах критикленӗ пулать. Федераци ведомствин тӳре-шари Чӑваш Ен юлашки вӑхӑтра ака лаптӑкне 247 пин гектар ҫухатнӑ, пӗрчӗллисене туса илессине икӗ хута яхӑн чакарнӑ тенӗ имӗш.

Республикӑра пулнӑ май вӑл __Шӑмӑршӑ районӗ|Шӑмӑршӑ__, __Патӑрьел районӗ|Патӑрьел__, __Комсомольски районӗ|Комсомольски__ тата __Ҫӗрпӳ районӗ|Ҫӗрпӳ__ районӗсенче пулнӑ. Унти хуҫалӑхсем ӗҫе аван йӗркеленине палӑртнӑ. Тепрехинче вӑл маршрута хӑй йӗркелеме, кая юлса пыракан районсене ҫитме, акаламан-сухаламан ҫӗрсене пӑхса ҫаврӑнма шантарнӑ-мӗн.

Кайран Чекмарев __Ҫӗрпӳре__ иртнӗ канашлӑва хутшӑннӑ. Унта республикӑн правительствин вице-премьерӗ — ял хуҫалӑх министрӗ Сергей Павлов тата республикӑн Патшалӑх Канашӗн депутачӗсем Николай Маловпа Олег Мешков, хӑш-пӗр район администрацийӗн пуҫлӑхӗсем, фермер хуҫалӑхӗсен ертӳҫисем пулнӑ.

«Атӑлҫи тӑрӑхӗнче пулнӑ виҫӗ регионтан пуринчен ытла мана Мӑкшӑ республики килӗшрӗ. Вӗсем акана вӗҫленӗ те. Пур ҫӗрте те хальхи вӑхӑтри агрегатсем, машинӑсем, хирсене лайӑх якатнӑ, минераллӑ удобрени нумай. Сирӗн вӑтам лару-тӑру», — тенӗ Чекмарев.

Мускав тӳре-шари Чӑваш Енре маларах ака-суха лаптӑкӗсем 800 пине яхӑн гектар пулнине, юлашки вӑхӑтра 552 пин юлнине палӑртнӑ. Тухӑҫ хӑй вӑхӑтӗнче (канашлура хамӑр пулман та, сӑмах хӑҫанхи пирки пынине калаймӑпӑр) 946 пин тонна тоннӑпа танлашнӑ-мӗн, халӗ 555 пин тенӗ. Республикӑна вӑл ҫывӑх ҫулсенче 700–800 пин тоннӑна та пулин ҫитме сӗннӗ.