Ҫак кунсенче __Хӗрлӗ Чутай районне__ республикӑн культура министрӗн ҫумӗ Татьяна Казакова ҫитсе унти клубсен ӗҫ-хӗлне тишкернӗ. Муниципалитетсенчи культура учрежденийӗсене методика пулӑшӑвӗпе тивӗҫтермешкӗн Культура министерствин специалисчӗсем ҫулсеренех ятарлӑ графикпа килӗшỹллӗн районсене тухса ҫỹреҫҫӗ иккен.

Татьяна Казакова ертсе пыракан ӗҫ ушкӑнӗ районти культура ҫурчӗсен ӗҫ-хӗлне тишкернӗ май ял тӑрӑхӗсен пуҫлӑхӗсемпе, клубсен, вулавӑшсен, архив, централизациленӗ бухгалтери ӗҫченӗсемпе тӗл пулни пирки асӑннӑ район хаҫачӗ хыпарлать. Сӑмах кӑҫал Раҫҫейре иртекен Культура ҫулталӑкне халалласа пурнӑҫламалли мероприятисем пирки пынӑ, культура ӗҫченӗсен шалӑвӗ пирки те калаҫнӑ. Культура ӗҫченӗсем халӑха паракан пулӑшусем ҫинче уйрӑммӑн чарӑнса тӑнӑ. Юлашки вӑхӑтра районта иртекен культура мероприятийӗсен шайӗ ỹссе пыни куҫ кӗрет-мӗн. Анчах та ялсенчи культура учрежденийӗсенче туса ирттерекен ӗҫсем иккӗлентереҫҫӗ иккен. Ҫав шутра клубсене каҫсерен уҫманни, халӑха нимӗнпе те кӑсӑклантарманни, хуҫисем ӗҫленӗ пек укҫа илсе ларни пирки пӑшӑрханни те тӗлӗтермӗшех мар-тӑр.

«Пирӗн пурнӑҫ» хаҫат, тӗслӗхрен, редакцине ҫакнашкалтарах ҫыру ҫитни пирки те пӗлтерет: «~~Пирӗн ял тӑрӑхӗнче пӗр клуб та йӗркеллӗ ӗҫлемест. Анчах та хуҫисем ӗҫленӗ пек укҫа илсе лараҫҫӗ. Пӗртен-пӗр йӗркеллӗ клубӗ те яланах хупӑ. Кӑнтӑрла кӑшт уҫса илеҫҫӗ те — ӗҫӗ те пӗтнӗ. Клубсем яланах халӑх валли уҫӑ пулнӑ — кӑнтӑрла та, каҫхине те. Халӗ вара каҫхи вӑхӑтра ҫамрӑксем барсенче, ҫӗрӗпех ӗҫлекен лавккасенче кӗпӗрленсе лараҫҫӗ, эрех-сӑра ӗҫеҫҫӗ. Урӑх ӑҫта каймалла вӗсен, клуб хупӑ пулсан? Нивушлӗ ҫамрӑксене, халӑха клуба явӑҫтарма май ҫук? Пирӗн шутпа, клубра каҫсерен шашка, шахмат, теннис, дартс выляма, интереслӗ каҫсем йӗркелеме пулать. Мӗншӗн клубпа туллин усӑ курмаҫҫӗ?..~~». Сӑмах хӑш ял тӑрӑхӗ пирки пынине вара асӑнман.

Татьяна Казакова культура ӗҫченӗсен хӑйсемшӗн мар, ҫынсемшӗн тимлемеллине палӑртнӑ. «Культура ӗҫченӗ район шайӗнчи мероприятисене хутшӑнни ялти клубра мероприяти иртнине пӗлтермест. Ӗҫ тухӑҫлӑ пултӑр тесен клубра лартнӑ пӗр концертпа ытти ялсене тухса ҫỹремелле, ҫав хушӑрах клубра та кашни кунах мӗн те пулин ирттермелле. Клуба ҫын ытларах килтӗр, анчах та вӗсем ахаль ан ларччӑр, кашни хӑйне май кӑсӑклану туптӑр», — тенӗ иккен министерство тӳре-шари.