Ӗлӗкрех ял уявӗсене ирттересси йӑлараччӗ. Шел те, юлашки вӑхатра ку чылай ҫӗрте манӑҫа тухса пырать. __Вӑрнар районӗнчи__ __Пуканкасси__ ялӗнче вара ак йӑлана тытсах пыраҫҫӗ.

Пуканкасси ял уявӗ нумаях пулмасть иртнӗ. Халӑх тӗплӗн хатӗрленнӗ. Ун умӗн тавралӑха тирпей-илем кӗртнӗ. Уяв кунӗнче чӑваш тумӗ тӑхӑнса клуб еннелле утнӑ. Унта тӗрлӗ тӗслӗ хӑюсем ҫакнӑ, хӑма ҫапса сцена тунӑ, шӳрпе ҫиме сӗтел хатӗрленӗ. Унтах алӑ ӗҫӗсен куравне йӗркеленӗ.

Икӗ урамра пурӑнакансем юрласа утса ял варринче тӗл пулнӑ, вӑйӑ картине тӑрса «Тутӑр ҫук, тутӑр ҫук» вӑйӑ вылянӑ. Уява ял тӑрӑхӗн депутачӗ Виктор Анисимов уҫнӑ. Унтан ял тӑрӑхӗн пуҫлӑхӗ Алексей Петров пурне те уяв ячӗпе саламланӑ.

Уявра Пуканкассинчи «Чашма» фольклор ушкӑнӗ, ветерансен «Утмӑлтурат» ушкӑнӗ, __Кушар Юнтапари__ юрӑпа ташӑ ушкӑнӗ, __Ярмушка__ ялӗнчи шулта вӗренекенсем юрӑ-ташӑпа савӑнтарнӑ.

Алӑ ӗҫӗсен куравӗ пите пуян пулнӑ. Пуканкассинчи Елена Васильева ав турӑшсене вӗтӗ шӑрҫаран ӑсталанӑ, Любовь Анисимова вак укҫасенчен шкатулка тунӑ, Мария Павлова ҫекӗлпе тата йӗппе тутӑрсем, салфеткӑсем ҫыхнӑ, тӗрленӗ. Валентина Маркова вара тӗрлӗ ҫипрен кавир ҫыхнӑ, Любовь Павлова пукан ҫиттисем хатӗрленӗ. Ярмушка ялӗнчи Раиса Перепелкина вӗтӗ шӑрҫапа турӑшсем тӗрленӗ. Алӑ ӗҫӗсен шучӗ те ҫук — кашниех хӑйӗн пултарулӑхне кӑтартма пултарнӑ.

Спорт ӑмӑртӑвӗсем хӗрӳ иртнӗ. Чи маттуррисене «Эльмен» пӗрлешӳ членӗн Хисеп хутне панӑ.

Пӗр сӑмахпа, Пуканкасси халӑхӗ пӗрле пухӑнса савӑннӑ, ӗлӗкхи йӑлана упраса хӑварассишӗн тӑрӑшнӑ.

__http://www.cap.ru/info.aspx?gov_id=59&type=news&id=2793358|**Сӑнсем**__ (86)