Ку конкурса патӑрьелсем ҫамрӑк специалистсен професси ӑсталӑхне, вӗсен ят-сумне ӳстерес тата вӗсене хавхалантарас тӗллевпе ирттернӗ. Ҫӗнтерӳҫӗсене районти Акатуйра, темӗн чухлӗ ҫын умӗнче чыслани хӑйех хисеп мар-и тата!

Сывлӑха сыхлас ӗҫре чи лайӑх ҫамрӑк специалист ятне __Патӑрьелти__ тӗп пульницӑра анестезиолог-реаниматологра тӑрӑшакан Татьяна Острякова тивӗҫнӗ. «Патшалӑхӑн ҫамрӑксен политики енӗпе ӗҫлекен чи лайӑх активист–общественник» — райадминистрацин вӗренӳ, социаллӑ аталану, информаци тивӗҫтерӗвӗ тата архив енӗпе ӗҫлекен пайӗн ҫамрӑксен канашӗн пайташӗ Татьяна Илюткина.

«Вӗренӳ ӗҫӗнчи чи лайӑх ӗҫчен» — Патӑрьелти 1-мӗш шкулта чӑваш чӗлхипе литературине вӗрентекен Наталия Путякова. Юлашкинчен асӑннӑ номинацире 2-мӗшпе 3-мӗш вырӑнсем те уйӑрнӑ. Вӗсене __Шӑнкӑртамри__ шкулта ют чӗлхене ӑша хывтаракан Чулпан Ишмуратова тата Патӑрьелти 1-мӗш шкулти чӑваш чӗлхипе литературин вӗрентекенӗ Ольга Каллина тивӗҫнӗ.

Правӑна сыхлакан органсенче вӑй хуракансенчен асӑннӑ районти муниципалитетсем хушшинчи уйрӑмри кадрсем енӗпе тӑрӑшакан Наталья Мишина инспектора ҫитекенни ҫук иккен.

Ял хуҫалӑхӗнче тӑрӑшакансене те 3 вырӑн таранах уйӑрнӑ. Вӗсене пурне «Батыревский» обществӑри ӗҫченсем тухнӑ: Петр Кудрявцев механизатор — пӗрремӗш йышӑннӑ, Александр Прыкин механизатор — иккӗмӗш, Василий Маллин электрик — виҫҫӗмӗш.

Муниципалитет тытӑмӗнче тар тӑкакансенчен __Ҫӗнӗ Ахпӳртри__ Людмила Кошкина специалиста палӑртнӑ, культура ӗҫченӗсенчен — Патӑрьелти халӑх театрӗн художник-постановщикӗ Ирина Егоровӑна, социаллӑ сферӑра — Патӑрьелти халӑха социаллӑ пулӑшу кӳрекен центр тӗп бухгалтерне Надежда Смеловӑна, усламҫӑсенчен — «Мечта» общество директорне Юрий Секретова, промышленноҫра тӑрӑшакансенчен — «Союз» общество кондитерне Наиля Тазюковӑна.