Кун пирки ЧНК сайчӗ пӗлтерет. Республикӑран инҫе ҫула Чӑваш Республикин тава тивӗҫлӗ культура ӗҫченӗ Зинаида Воронова, Сӗнтӗрвӑрри ентешлӗхӗн ертӳҫи тата эстрада юрӑҫи Андрей Кузнецов, Людмила Кинер юрӑҫ тата тинтерех ҫеҫ Чӑваш наци конгресӗнче йӗркеленнӗ информаци службин ертӳҫи Зоя Яковлева тухнӑ.

ЧНК ӗҫтешӗсем Хӗрлӗҫыртан (Красноярскран) инҫех мар вырнаҫнӑ Шуваево чӑваш ялӗнчи Акатуя хутшӑннӑ — республикӑран салам ҫитернӗ, концерта хутшӑннӑ. Хӗрлӗҫыр хулипе пуллашнӑ хыҫҫӑн пирӗн ентешсем Иркутск хулине ҫул тытнӑ.

Байкал (чӑв. ~~Пуян кӳлӗ~~) кӳлли тӑрӑхӗнче вӗсем вырӑнти чӑвашсемпе тӗл пулнӑ. Уйрӑмах Энтри атте пачӑшкӑ вӗсене пулашса тарать иккен. Шел те, хӑйӗнпе тӗл пулма май пулман. Вырӑнтисем каласа панӑ тӑрӑх вӗсем ҫывӑх вӑхӑтра Иркутскра вырсарни шкулӗ ӗҫлесе каясса кӗтеҫҫӗ мӗн. Ҫавӑн пекех Шупашкар элчисем облаҫӗн тӗп хулинчен 200 ҫухрӑмра вырнаҫнӑ Новолетник ялне те ҫитсе курнӑ.

Новолетник ялӗ 106 ҫул каялла пуҫланса кайнӑ. Тайга варринчех вырнаҫнӑ яла __Патӑрьел районӗнчи__ __Кивӗ Ахпӳрт__ ҫынни пуҫласа янӑ пулать. Вӗсем киличчен кунта бурятсен сурӑхсене ҫитермелли ҫуллахи кану вырӑнӗ пулнӑ иккен. Чӑвашсене ҫурт лартма та бурятсем пулӑшнӑ. Кунта тӗпленнӗ чӑвашсем вара майӗпен тӑванӗсене чӗнсе илнӗ пулать. Саян тӑвӗсенчен юхса анакан Ока юханшывӗ хӗрринче вырнаҫнӑ чӑн чӑваш ялӗнче халӗ икҫӗре яхӑн ҫын пурӑнать. Ялта медпункт, почта, шкул пур. Ватӑраххисем чӑвашла таса калаҫаҫҫӗ пулсан, ачасем тӑван чӗлхене пӗлмеҫҫӗ, анчах хӑйсем чӑваш пулнипе, чӑвашла юрлама пултарнипе мӑнаҫланаҫҫӗ. Ҫамрӑк ӑру валли кунта «Йӑмра», «Телей», «Савӑнӑҫ» ятлӑ юрӑ-ташӑ ансамблӗсене йӗркеленӗ.

Унсӑр пуҫне Чӑвашран килнӗ элчӗсем Зима районӗнчи Виҫҫӗмӗш Успени ялне те ҫитсе курнӑ. Ӑна 105 ҫул каялла никӗсленӗ пулать, халь унта 121 ҫын пурӑнать. Ялта культура центрӗ, шкул, почта тата аптека пур.