Кӑҫалхи пуш уйӑхӗ сивӗ тӑрать. Сӑмахран, ку эрне пуҫламӑшӗнче, тунтикун, термометр ҫӗрле -20°C таранах аннӑччӗ. Халӗ те, уйӑх вӗҫленсе пырать пулин те, ирхи температура 0 градусран хӑпармасть, юрӗ хӗвел хӗртнипе ҫеҫ кӑшт ирӗлет. Хӑҫан ӑшӑтса ярӗ-ши? текен ыйту нумай вулакана кӑсӑклантарать.

Gismeteo портал пӗлтернӗ тӑрӑх ӑшӑ ҫанталӑк пирӗн тӑрӑха ака уйӑхӗн пуҫламӑшӗнче ҫитӗ — ҫӗрле 0°C патнелле пулӗ, кӑнтӑрла — +2–+8. Ака уйӑхӗн 17-мӗшӗнче уйрӑмах ӑшӑтса ямалла: ун умӗн кӑнтӑрла +15 пуласса шантараҫҫӗ, вӑл кунхине вара сывлӑш ҫуллахи пекех ӑшӑ тӑрӗ — +18°C пулӗ. Унашкал ҫанталӑк 2–3 куна ҫеҫ тӑсӑлӗ.

Асӑрхаса хӑвармалла — уйӑх маларах тунӑ прогнозсем ытларах чухне пурнӑҫланмаҫҫӗ. Акан 17-мӗшӗ ҫитиччен тата виҫӗ эрне ытларах кӑна юлчӗ, Гисметео шантарни тӳрре тухнипе тухманнине палӑртма нумаях юлмарӗ темелле.

#ҫанталӑк, #ҫутҫанталӑк, #ӑшӑ