Иртнӗ ҫулӑн раштав уйӑхӗнчи 15-22-мӗш кунӗсенче И.Н. Ульянов ячӗллӗ Чӑваш патшалӑх университечӗ чӑваш чӗлхипе литературине тата тӑван ен культурине кӑмӑллакан 10-11-мӗш класс ачисем валли «Сенкер инҫет» олимпиадӑн пӗрремӗш тапхӑрне ирттерчӗ. Тӗнче тетелӗн ҫыхӑнӑвӗпе усӑ курса Чӑваш Республикинчен тата кӳршӗллӗ регионтан пурӗ 113 вӗренекен хӑйсен пӗлӗвне кӑтартма пултарчӗ.

Олимпиадӑн пӗтӗмлетӳллӗ иккӗмӗш тапхӑрне хутшӑнма жюри ҫителӗклӗ балл пухма пултарнисене суйласа илчӗ:

• «Тӑван ен культурипе» — 25 баллран кая мар;

• «Чӑваш чӗлхипе литератури» (чӑваш шкулӗсем) — 35 баллран кая мар;

• «Чӑваш чӗлхипе литератури» (вырӑс шкулӗсем) — 40 баллран кая мар.

Пӗрремӗш тапхӑра ӑнӑҫлӑ вӗҫленӗ шкул ачисене эпир хӗрӳллӗн саламлатпӑр, ҫитес ӑмӑтура та ӑнӑҫу сунатпӑр!

«Сенкер инҫет» олимпиадӑн пӗтӗмлетӳллӗ тапхӑрӗ асӑннӑ университетӑн чӑваш филологийӗпе культура факультетӗнче нарӑсӑн 21-мӗшӗнче иртет. Ӑмӑртӑва хутшӑнакансене регистрацилемелли вӑхӑт — 9.30-10.30. Олимпиада пуҫламӑшӗ — 10.30. Шкул ачисен хӑйсен ҫумӗнче ҫак документсем пулмалла:

1) Паспорт (вӑл пропуск шутланать);

2) Шкулта вӗреннине ӗнентерекен справка.

Адрес: Шупашкар, Университет урамӗ, 38-мӗш ҫурт, 4-мӗш хут. Пирӗн пата троллейбуспа (4, 12, 14, 21) е маршрут таксипе (32, 35, 49, 52, 61) «Университет» чарӑнӑва ҫитиччен килмелле. Хапӑл туса кӗтетпӗр!

Олимпиада ҫӗнтерӳҫисене жюри иккӗмӗш тапхӑр хыҫҫӑн палӑртать.

#олимпиадӑсем, #Чӑваш патшалӑх университечӗ, #Чӑваш филологийӗпе культура факультечӗ