Кӑҫалхи кӑрлач–ҫу уйӑхӗсенче пирӗн республикӑри 39 ҫын ӗҫсӗрлӗх пособине суя мелпе илнӗ.

Чӑваш Ен Ӗҫ тата социаллӑ хӳтлӗх министерстви пӗлтернӗ тӑрӑх, ҫынсем ӗҫсӗрлӗх центрӗсенче учета тӑнӑ чух хӑйсем ӗҫленине пытараҫҫӗ. Официаллӑ ӗҫлемесен ӗҫсӗрлӗх центрӗнче шутра тӑма юрать теҫҫӗ курӑнать.

Маларах асӑннӑ 39 ҫын 248,6 пин тенкӗлӗх пособи илнӗ, ҫав шутран 197,5 пин тенкине хыснана тавӑрса панӑ. Ытти укҫана та шыраса илӗҫ.

Суйса пособи илнисем тӗлӗшпе материалсене право тытӑмне ярса панӑ тесе хыпарланӑ Чӑваш Ен Ӗҫ тата социаллӑ хӳтлӗх министерствин пресс-службинче. Улталаса укҫаллӑ пулнисене административлӑ тата пуҫиле майпа явап тыттарӗҫ.

#ӗҫ вырӑнӗсем, #ӗҫсӗррисем, #укҫа-тенкӗ, #Ӗҫ министерстви, #яваплӑх