Чӑваш патшалӑх академи драма театрӗн сӑнӳкерчӗкӗ

Чӑваш Енри Театр ӗҫченӗсен союзне ҫӗнӗ ҫын ертсе пыма тытӑннӑ. Пӗрлешӗвӗн председателӗ пулнӑ Сергей Павлов ку должноҫрен кайма йышӑннӑ.

Чӑваш Енри Театр ӗҫченӗсен союзӗ — республикӑри профессиллӗ пӗрлешӳсенчен пӗри. Вӑл чылай ҫул ӗҫлет. Хӑй вӑхӑтӗнче ӑна Виктор Родионов тата Нина Григорьева артистсем; Леонид Родионов тата Валерий Яковлев режиссёрсем, Мефодий Денисов юрӑҫ тата ыттисем ертсе пынӑ.

Сергей Павлов та хӑйӗн тивӗҫне чунтан пурнӑҫланӑ. Республикӑн культура министрӗ Светлана Каликова палӑртнӑ тӑрӑх, Сергей Павлов вӑл Чӑваш Енри театр ӳнерне аталантарассишӗн те самай тӑрӑшнӑ.

Халӗ пӗрлешӗве унпа пӗр курсра вӗреннӗ Евгений Урдюков ертсе пыма пуҫланӑ. Вӑл та, Сергей Павлов пекех, Чӑваш академи драма театрӗн артисчӗ.

#пӗрлешӳсем, #артистсем, #театрсем