«Контактра» халӑх тетелӗнчи сӑн

Хӗрлӗ Чутай округӗнчи Атнар шкулӗнче агротехкласс ӗҫлеме пуҫланӑ. Унта округри 10-мӗш класра вӗренекен 33 ҫамрӑк ӑс пухӗ.

Ятарлӑ пӳлӗме тӗпрен юсанӑ,техникӑпа тивӗҫтернӗ. Интерьера ял хуҫалӑхӗнчи фирма тӗсӗсемпе илемлетнӗ: симӗс тата шурӑ. Ҫавӑн пекех хальхи йышши сӗтел-пукан лартнӑ, пособисемпе тивӗҫтернӗ, ҫав шутра – чӗрчунсен макечӗсем те.

Агротехкласс округри «Комминтерн» хуҫалӑхпа килӗштерсе ӗҫлӗ. Шӑпах унӑн ертӳҫи Альбина Новикова ҫак класа уҫма пуҫарнӑ та. Агротехкласа хуҫалӑхпа юнашар шкулта уҫни те ахальтен мар – шкул ачисем унта тӑтӑшах практика тухӗҫ, унти ӗҫ-хӗле шалтан курӗҫ.

Агротехкласра занятисем кашни юнкун иртӗҫ. Программӑна «Генетика, селекци тата чӗрчунсен биотехнологийӗ», «Агрофизика» курссем кӗрӗҫ.

#вӗренӳ, #Хӗрлӗ Чутай районӗ, #Атнар