МАХри «Хыпар - Вести Чувашии» каналтан илнӗ сӑнӳкерчӗк

Улькка Эльмен ҫыравҫӑ «Тӑван Атӑл» журнал редакторӗ пулӗ. Кун пирки МАХри «Хыпар - Вести Чувашии» каналта паян пӗлтернӗ.

Ольга Куликова 1961 ҫулта Вӑрнар районӗнчи Авшак Эльмен ялӗнче ҫуралнӑ. Нурӑсри вӑтам шкулта ачасене чӑваш чӗлхипе литератури вӗрентнӗ, Санарпуҫӗнчи вӑтам шкулта директор ҫумӗ пулнӑ, «Ҫӗнтерӳ ҫулӗ» хаҫатра, район администрацийӗнче, «Капкӑн» журнал редакцийӗнче ӗҫленӗ. «Вурнарыдорстрой» акционерсен уҫӑ пӗрлешӗвӗн генеральнӑй директорӗ пулнӑ.

«Ма инҫе-ши ҫӑлтӑрӑм?», «Кая юлнӑ ӳкӗнӳ», «Ҫирӗп чунлисем телейлӗ», «Упраймарӑм сана…», «Сарӑ кӗпе» кӗнекисене нумайӑшӗ вуланӑ-тӑр.

«Ольга Геннадьевнӑн ертӳҫӗ пултарулӑхӗ те питӗ пысӑк. Вӑл паянхи вулакана мӗн кирлине туйнӑран «Тӑван Атӑл» журнала ҫӗнӗ шая ҫӗклесси пирки иккӗленместӗп», — тенӗ «Хыпар» издательство ҫурчӗн директорӗ - тӗп редакторӗ Дмитрий Моисеев.

#тӳре-шара, #ӗҫ вырӑнӗсем, #МИХсем, #литература, #журналсем, #культура, #чӑвашлӑх