Г. Зотова сӑнӳкерчӗкӗ

Чӑваш халӑх ӑс-хакӑлӗпе ӳнер академийӗ ӗнер, чӳкӗн 30-мӗшӗнче, чӑваш наци вулавӑшӗнче отчетпа суйлав пухӑвӗ ирттерчӗ. Залра «Краеведение Чувашии: история и культура» кӗнекесен куравӗ те йӗркеленӗччӗ. Унта 2013-мӗш ҫулта таврапӗлӳлӗх темипе кун ҫути курнӑ кӗнекесемпе паллашма май пурччӗ. Отчет пухӑвӗ тӗлне «Умы народа» журналӑн иккӗмӗш номерӗ те кун ҫути курнӑ.

Кун йӗркинче 8 ыйту пулнӑ: академии пайташӗсен ретне ҫӗнӗ ҫынсене илесси, ЧХӐХӲА президенчӗн отчечӗ, ревизи комиссин отчечӗ, асӑннӑ отчетсем тӑрӑх калаҫасси, ҫӗнӗ президент суйлавӗ, ревизи комиссин председательне суйласси, президиум пайташӗсене суйласси, тата ревизии комиссин пайташӗсене суйласси. Пуху пуҫламӑшӗнче академи членӗсем пурнӑҫран уйрӑлса кайнисене ура ҫине тӑрса пӗр минут шӑп тӑчӗҫ.

Ҫӗнӗ ҫынсене илес умӗн кашни кандидат хӑйӗнпе паллаштарчӗ: чӑвашлӑхшӑн тӗрлӗ ӗҫре тӑрӑшакан В.Антонов, С.Петровский, Н.Семенов, П. Сидоров, А. Ефимов, В.Макаров, С. Федотов, Р. Петрова, М. Кузьмина тата ыттисем чӑннипех те академик ретне кӗме тивӗҫлӗ терӗҫ. И.Дубанов вӗсене удостоверени парса чысларӗ. Хисеплӗ академик Виталий Станьял пултаруллсене Хисеплӗ таврапӗлӳҫӗ ят парса чысларӗ.

Халӑх ӑс-хакӑлӗпе ӳнер академийӗн президенчӗ Евгений Евстафьевич Ерагин хӑйӗн докладӗнче организаци ҫулталӑк хушшинче тунӑ ӗҫсене тишкерсе тухрӗ, академин хастар членӗсене тӗрлӗ награда парса чысларӗ, ҫӗнӗ президиума татах та хастартарах ӗҫлеме сӗнчӗ. «Кашни кӗҫнерникун таврапӗлӳ кунӗсем наци библиотекинче иртеҫҫӗ, 20 хутчен краеведенипе ҫырнӑ кӗнекесен хӑтлавӗ ирттернӗ. Тӗллев — чӑвашла картта тӑвасси, ал ӗҫ пултарулӑхне аталантарасси, Чӑваш Республикине ҫӳллӗ шая ҫӗклеме пулӑшасси тата ытти те», — терӗ вӑл хӑйӗн сӑмахӗнче.

Виталий Петрович Станьял малашлӑхра 8 уйрӑмпа ӗҫлеме сӗнчӗ, кашни пай ӑшӗнче тӗрлӗ секцисем тума сӗнчӗ. Ӑсчаха Шупашкар хулине кӗрсен чӑваш хулинче мар, таҫти ют ҫӗршыва лекнӗ пек туйнине пӑшӑрханса каларӗ, урамсен, лавккасен, учрежденисен ячӗсене ытларах чӑвашла ҫырма сӗнчӗ. Академика чӑваш лицейӗ хупӑнни те пӑшархантарать. Пуху обществӑлла организации лайӑх ӗҫленине палӑртрӗ, унӑн президентне Ерагинах суйлама сӗнчӗ. Ревизи комиссии членӗ пулма 3 ҫынна, президиум членӗсем пулма 12 ҫынна суйларӗҫ.

#вулавӑшсем, #пухусем, #халӑх академийӗ, #чӑваш наци вулавӑшӗ, #таврапӗлӳ