Ӗнер Чӑваш Енӗн агропромышленноҫ комплексӗн малашнехи аталану ҫул-йӗрне сӳтсе явнӑ. Тӗлпулӑва унта район администрацийӗсен пуҫлӑхӗсем, ял хуҫалӑх тата тирпейлекен предприятисен ертӳҫисем пухӑннӑ.

Чӑваш Ен Элтеперӗ Михаил Игнатьев патшалӑх самай пулӑшу кӳнине палӑртнӑ. Сӑмахне цифрӑсемпех ҫирӗплетнӗ — иртнӗ ҫул асӑннӑ отрасль валли республикӑра пӗтӗмпе 2,45 миллиард тенкӗ уйӑрнӑ. 2012 ҫулхипе те танлаштарса пӑхнӑ: укҫа виҫи 19 процент хутшӑннӑ.

Ял хуҫалӑхӗнче аш-пӑш тата сӗт туса илни ҫулталӑкӗпех тупӑш кӳнине асӑнса хӑварнӑ. Ҫавӑнпа та фермӑсене малашне те юсаса-ҫӗнетсех тӑмалла. Сӗт-ҫӑва тирпейлесе республика тулашне ӑсатассине те йӗркелемелле. Михаил Игнатьев сӗт отрасльне мӗн чухлӗ усламҫӑна явӑҫтарни тӑрӑх район администрацийӗсен пуҫлӑхӗсен ӗҫне хаклама май пуррине те систерсе хӑварнӑ. 3–5 ҫулта ял хуҫалӑхне пысӑк укҫаллӑ пӗр инвестора та явӑҫтарайман тӑк, район админстрацийӗн пуҫлӑхӗ хӑйӗн тивӗҫӗсене пурнӑҫласа ҫитереймест тесе пӗтӗмлетме юрассине палӑртнӑ.

Республикӑн ял хуҫалӑх министрӗ Сергей Павлов иртнӗ ҫул 23 фермӑна юсанине е ҫӗнӗрен туса лартнине пӗлтернӗ. Ҫӗнетме палӑртнӑ пысӑк кайӑк-кӗшӗк фабрикисемпе сысна фермисем татах та пур. Ун йышшисем шутӗнче Шупашкар районӗнчи «Прогресс» акционерсен хупӑ обществине, «Юрма» агрохолдинга, «Акашевская» кайӑк-кӗшӗк фабрикине асӑнса хӑварнӑ. Вӗсене юсаса ҫӗнетсен продукци туса илесси тепӗр виҫӗ ҫулта 20 пин тонна чухлӗ ӳсмелле.

Лайӑхпа министр Елчӗк районне асӑннӑ. Унта иртнӗ ҫул кӑна 5 инветсици проектне пурнӑҫа кӗртнӗ.

#ял хуҫӑлӑхӗ, #ларусем, #хуҫалӑхсем, #усламҫӑсем, #Шупашкар районӗ, #Елчӗк районӗ