Чӑваш Ери спортсмен Раҫҫей чемпионатӗнче ылтӑн медаль ҫӗнсе илнӗ. Вӑл ММА хутӑш кӗрешӗвӗ енӗпе иртнӗ тупӑшӑва хутшӑннӑ. Фарход Рахмоналиев чемпион ятне тӑваттӑмӗш хут тивӗҫнӗ.
Виҫӗ куна пынӑ ӑмӑртура 52,2 килограмм таякансен виҫе категорийӗнче пирӗн ентеш ытти регион спортсменӗсем валли нимӗнле шанчӑк та хӑварман – вӑл пурне те ҫӗнтернӗ.
Чӑваш Енри тепӗр спортсмен вара кӗмӗл медаль илнӗ. Вӑл – 47,6 килограмм таякан виҫе категорийӗнче вӑй виҫнӗ Ольга Васеева.
Шупашкарта пурӑнакан хастар ватӑсем паян пӗр шухӑшлӑ пулса пысӑк йышпа хулари парксенчен пӗринче пухӑннӑ. Вӗсем Пӗтӗм тӗнчери скандинави уттин кунне ҫавӑн пек паллӑ тунӑ.
Икӗ алла икӗ туя тытса утакансен йышне чӑваш парламенчӗн депутачӗ Виктор Горбунов та тӑнӑ. Вӑл «Аслӑ ӑру» парти проекчӗн республикӑри координаторӗ пулнӑ май кинемейсене сывӑ пурнӑҫ йӑли-йӗркине тытса тӑнӑшӑн ырласа мухтанӑ.
Скандинави уттин кунне хутшӑннисен йышӗнче 83 ҫулти Стаина Гурьева та пулнӑ. Халӑхпа иртекен пысӑк мероприятисене вӑл яланах хастар хутшӑнать иккен. Спортпа та туслӑ, ал ӗҫӗпе аппаланма юратать, хулари культура учрежденийӗсене тухса ҫӳрет.
Раҫҫей ҫар искусствисен регионти уйрӑмӗн вӗренекенӗ Ева Митрякова Ӗпхӳре хутӑш кӗрешӳ енӗпе иртнӗ Пӗтӗм Раҫҫейри ӑмӑртура кӗмӗл медаль ҫӗнсе илнӗ.
Ева 18-20 ҫулсенчи спортмсенсемпе ӑмӑртнӑ. 61,2 килограмм таякан виҫе категорийӗнче вӑл иккӗмӗш вырӑна тухнӑ. Пирӗн ентеш Ҫурҫӗр Осетири спортменкӑна парӑнтарнӑ. Финалта вара Мускаври спортсменкӑна ҫӗнеймен.
Пирӗн ентеш, Олимп резервӗсен Ҫӗнӗ Шупашкарти 3-мӗш спорт шкулӗн йывӑр атлечӗ Полина Андреева, ылтӑн медаль ҫӗнсе илнӗ. Вӑл Беларуҫре иртнӗ тупӑшура икӗ енлӗ кӗрешӳре 165 килограмм йӑтнӑ.
Ӑмӑрту Могилев хулинче иртнӗ. Унта йывӑр атлетикӑпа кӑсӑкланакан хӗрарӑмсем тата арҫынсем хутшӑннӑ. Пирӗн Полина Андреева 49 килограмм тайман спортсменсен ушкӑнӗнче чи маттурри пулса ылтӑн медале тивӗҫнӗ.
Чӑваш Енри ҫӑмӑл атлета Элтепер стипендине уйӑхсерен парса тӑрӗҫ.
Республика ертӳҫин Олег Николаевӑн йышӑнӑвӗпе килӗшӳллӗн Михаил Киргизов ҫӑмӑл атлет уйӑхсерен 25-шер пин тенкӗ стипенди илсе тӑрӗ. Укҫана кӑҫалхи пуш уйӑхӗн 1-мӗшӗнчен пуҫласа раштав уйӑхӗн 31-мӗшӗччен парӗҫ.
Михаил Киргизова Раҫҫейӗн пӗрлештернӗ спорт командине йышӑннӑ. Вӑл йыш Олимп вӑййисен программине спортӑн ҫуллахи енӗпе хутшӑнма хатӗрленет.
Михаил Киргизов Патӑрьел районӗнчи Первомайскинчен.
Чӑваш Енри спортсмен суккӑр ҫынсен пауэрлифтинг енӗпе иртнӗ Раҫҫей чемпионатӗнче ҫӗнтернӗ.
Никита Линик (сӑнӳкерчӗкре – сылтӑмра) – Шупашкарти Спортпа адаптаци шкулӗн воспитанникӗ, спорт мастерӗн кандидачӗ.
Раҫҫей чемпионачӗ Челепир хулинче иртнӗ. Унта Никита ылтӑн медале ҫӗнсе илнӗ.
Чӑваш Енӗн Спорт министерствинче пӗлтернӗ тӑрӑх, пултаруллӑ каччӑн тренерӗ — Александр Булатов.
Олимп резервӗсен 2-мӗш спорт шкулӗнче ӑсталӑхне туптакан Лана Прусакова фристайл енӗпе 9-мӗш хут Раҫҫей чемпионкт пулса тӑнӑ. Палӑртмалла, Лана 2018 ҫулта хӗллехи Олимп вӑййисене хутшӑннӑ, 2019 ҫулта Пӗтӗм тӗнчери хӗллехи Универсиадӑра ҫӗнтернӗ.
Хальхинче Лана Прусакова "слоуп-стайл" дисциплинӑра ылтӑн медаль ҫӗнсе илнӗ. Ҫапла вӑл тупӑшӑвӑн юлашки кунӗнче палӑрнӑ.
Ҫӗмӗрле муниципаллӑ округӗнче ӗнер тӳре-шара хушшинче шашкӑпа шахмат енӗпе ӑмӑрту иртнӗ. Вырӑнти влаҫ органӗсен официаллӑ сайчӗ хыпарланӑ тӑрӑх ӑмӑртӑва мӗнпурӗ 19 ҫын хутшӑннӑ. Вӗсем: округ администрацийӗпе территори пайӗсенчи ӗҫченсем.
Ӑмӑртӑва администрацин вӑй-хал культури, спорт тата ҫамрӑксен политикин сектор заведующийӗ Николай Чангайкин чаплӑн уҫнӑ. Хӑйӗн сӑмахӗнче вӑл хутшӑнакансемпе паллаштарнӑ кӑна мар, ҫак спорт тӗсӗ ыттисем хушшинче 8-мӗш вырӑн йышӑннине те палӑртнӑ. Ӑмӑртун тӗп тӳри Сергей Иовлев хутшӑнакансене вӑйӑ йӗркине ӑнлантарса панӑ.
Шашкӑлла вылянӑ май пӗрремӗш вырӑна Хутар территори пайӗнчи Дмитрий Александровпа Анат Кӑмаша территори пайӗнчи Валентина Губанова йышӑннӑ. Виҫҫӗмӗш вырӑн Юманай тӑрӑхӗнчи Олег Яковлева лекнӗ.
Шахмат енӗпе вара пӗрремӗш вырӑна Юманай территори пайӗнчи Сергей Измайлов йышӑннӑ. Иккӗмӗш вырӑн Егоркино территори пайӗнчи Ольга Улисовӑпа Турхан территори пайӗнчи Вениамин Яскея лекнӗ.
Чӑвашсем спорт туризмӗ енӗпе тӗнчере палӑрнӑ.
Минск хулинче Спорт туризмӗн тӗнчери чемпионачӗн пӗтӗмлетӳллӗ тапхӑрӗ иртнӗ. Чӑвашсем унта хутшӑнса кӗмӗл тата бронза медальсене тивӗҫнӗ.
Тӳресем спортсменсен маршрутне хакланӑ май кӑткӑслӑха, хӑрушсӑрлӑха, ҫӗнӗлӗхе тата ытти нумай ене шута илнӗ.
Кӗмӗл медале чӑваш спорстменӗсем кӑткӑслӑх енчен пиллӗкмӗш категорие кӗрекен ту маршручӗпе ҫӗнсе илнӗ. Ҫав ҫул Тӗп Кавказ тӑвӗсенчен пуҫласа Караугом, Дигори тата Суган районӗсем патӗнчен иртнӗ.
Кӑткӑслӑх енчен улттӑмӗш категорие кӗрекен маршрутшӑн пирӗннисене бронза медаль панӑ. Асӑннӑ маршрут Кӑркӑстанри Тянь-Шань тӑвӗнчен пуҫӑннӑ.
Шупашкарта пурӑнакан Марат Шарипов Египетри Шарм-эль-Шейхра иртнӗ теннис турнирӗнче выляса илнӗ.
20 ҫулти Марат Латви спортсменне Роберт Стромбаха выляса илнӗ. Каччӑ турнирта ҫӗнтернӗ хыҫҫӑн АТР рейтингӗнче 122 йӗрке хӑпарса 674-мӗш вырӑна йышӑннӑ.
Марат хулари 1-мӗш шкулта вӗреннӗ, Шупашкарти теннис академийӗнче ӑсталӑхне туптанӑ. 2020 ҫулта вӑл тӗнчери 19 ҫул тултарман топ-50 спортсменсен йышне кӗнӗ.
+2.3 °C