Чӑваш Енӗн ӗҫ тата социаллӑ хӳтлӗх министрӗн ҫумӗ пулма Александр Колесникова шаннӑ. Унччен ҫав должноҫе йышӑннӑ Виктор Ковалёва утӑ уйӑхӗн 10-мӗшӗнче министерствӑри портфельсӗр хӑварнӑччӗ. Ҫак ведомствӑра Виктор Ковавлёв 2016 ҫулхи утӑ уйӑхӗн 9-мӗшӗнченпе ӗҫленӗччӗ.
Паянтан вара Чӑваш Енӗн ӗҫ тата социаллӑ хӳтлӗх министрӗн ҫумӗ пулма Александр Колесникова шаннӑ. Ӗҫлӗ хута ЧР Министрсен Кабинечӗн Ертӳҫи Иван Моторин алӑ пуснӑ. Документа влаҫ органӗсен официаллӑ порталне вырнаҫтарнӑ.
Ҫак йӗркесен авторӗ пӗлнӗ тӑрӑх, Александр Колесников юлашки вӑхӑтра Шупашкарти «Аспект» вӗренӳпе методика центрӗн пуҫлӑхӗнче ӗҫлерӗ. Асӑннӑ учреждени ЧР Ӗҫ тата социаллӑ хӳтлӗх министерствин шутланать.
Шупашкарти регби-клуб пайташне Раҫҫейӗн пӗрлештернӗ командине йышӑннӑ. Сӑмах Андрей Карзанов пирки пырать.
Чӑваш Енӗн Спорт министерствин пресс-службинче пӗлтернӗ тӑрӑх, Андрей Карзанов — Шупашкарти «Молот» регби-клуб пайташӗ. Халӗ вӑл «Локомотив – Пенза» профессилле регбол дружининче вылять. Ӑна Раҫҫейӗн пӗрлештернӗ командине илнӗ.
Иртнӗ канмалли кунсенче нацин пӗрлештернӗ команди Европа чемпионачӗн иккӗмӗш тапхӑрӗнче ӑмӑртнӑ. Ӑмӑрту Польшӑри Лодзь хулинче иртнӗ. Пирӗн ҫӗршыв команди унта тӑххӑрмӗш вырӑн йышӑннӑ.
Эпир пӗлнӗ тӑрӑх, Андрей Карзанов 1999 ҫулхи чӳк уйӑхӗн 5-мӗшӗнче Шупашкарта ҫуралнӑ. Регбол енӗпе вӑл Чӑваш Енри ӑста спорстменсенчен пӗри пулнӑ. Халӗ вӑл — «Регби-7» йышӗнче.
Паян, утӑ уйӑхӗн 22-мӗшӗнче, РСФСР халӑх артисчӗ, Чӑваш АССР халӑх артисчӗ, К. Станиславский ячӗллӗ патшалӑх премийӗн лауреачӗ Виктор Родионов (22.07.1924-19.05.1987 ҫҫ.) ҫуралнӑранпа 95 ҫул ҫитнӗ.
Артистӑн пултарулӑх биографийӗ К.В. Иванов ячӗллӗ Чӑваш патшалӑх академи драма театрӗпе ҫыхӑннӑ. Сӗнтӗрвӑрринче ҫуралнӑскер чӑн-чӑн сцена ӑсти пулнӑ. Шупашкарти музыка училищинче тата А. Луначарский ячӗллӗ Мускаври театр ӳнерӗн институчӗн чӑваш студийӗнче вӗреннӗ. Пачӑшкӑ ывӑлӗ, вырӑс пулин те пӗчӗкрен чӑвашла вӗреннӗ.
40 ҫул хушшинче Виктор Родионов тӗрлӗ характерлӑ, тӗрлӗ ӳсӗмри, шалти тӗнче енӗпе пачах расна 300 ытла сӑнара ӗнентерӳллӗн калӑпланӑ. Ӑна аслӑ ӑрурисем кӑна мар, ҫамрӑксем те аван пӗлеҫҫӗ.
Шупашкарти 61-мӗш шкул ҫумӗнче инженери-техника шкулӗ уҫӗҫ. Ку проект пурнӑҫланасси вӗренӳ учрежденийӗн ҫӗнӗ корпусне уҫнипе ҫыхӑннӑ.
Проекта 1-мӗш класра вӗренекен шкул ачисем те хутшӑнма пултараҫҫӗ. Малтанхи тапхӑрта шӑпӑрлансене инженери-техника профилӗнчи профессисемпе паллаштарӗҫ. Иккӗмӗш тапхӑр – 5-7-мӗш классем валли. Вӗсем валли проектированипе практика занаятийӗсем те пулӗҫ.
Виҫҫӗмӗш тапхӑрта ачасем шкулти пӳлӗмсемпе лабораторисенче кӑна мар, Регионсен хушшинчи компетенци центрӗ тата И.Н.Ульянов ячӗллӗ ЧПУ ҫумӗнче те вӗренӗҫ. Шкул ачисемпе Чапаев савучӗ тӳрреммӗн ӗҫлӗ.
Кун хыҫҫӑн ачасем икӗ ҫултан пӗрне суйлама пултарӗҫ: колледжсен е техникумсен ҫумӗнче профиль вӗренӗвне малалла тӑсӗҫ е 11-мӗш класс хыҫҫӑн аслӑ шкулта инженери-техника специальноҫне суйлӗҫ.
Шупашкарта пурӑнакан 18 ҫулти хӗр пирки тӑванӗсем темиҫе кун нимӗн те пӗлмеҫҫӗ. Гасанова Эльнара Эльшановна утӑ уйӑхӗн 17-мӗшӗнче килтен тухса кайнӑ та таврӑнман.
Хӗрӗн тӑванӗсем «Лиза Алерт» ҫӑлавпа шырав отрячӗн хастарӗсенчен пулӑшу ыйтнӑ. Эльнара киле пиллӗкмӗш кун таврӑнманни вӗсене пӑшӑрхантарать.
Пике 160 сантиметр ҫӳллӗш, хура ҫӳҫлӗ, куҫӗ кӑвак. Юлашки хутчен килтен тухса кайнӑ чухне Эльнара джинсовка, хура комбинезон, шурӑ кроссовкӑ тӑхӑннӑ пулнӑ. Ҫак хӗр пирки мӗн те пулин пӗлекенсене 8 (800) 700 - 54 - 52 е 112 номерпе шӑнкӑравлама ыйтаҫҫӗ.
ЧР ШӖМӗн ӗҫченӗсем «Ҫынна ҫӑлнӑ чухнехи паттӑрлӑхшӑн» медальсене тивӗҫнӗ. Ӑна пилӗк ӗҫчене панӑ. Вӗсем ҫынсене пушартан тухма пулӑшнӑ.
Юрий Плотников подполковник ывӑлӗпе пӗрле Муркаш районӗнче 17 ҫулти каччӑн пурнӑҫне ҫӑлнӑ. Ҫамрӑкскер сусӑр, пушар алхасма тытӑнсан вӑл хӑй тӗллӗн урама тухайман.
Александр Федоров лейтенантпа Евгений Ильин сержант Шупашкарти пӗр урамра мунча ҫуннине асӑрханӑ. Вӗсем юнашарти ҫурта кӗрсе тӑватӑ ҫынна урама тухма пулӑшнӑ.
Дмитрий Георгиев лейтенантпа Александр Румянцев аслӑ сержант Шупашкарти Олег Кошевой урамӗнчи ҫунакан пӗр ҫуртран сусӑр арҫынна урама илсе тухнӑ. Кайран вӗсем нумай хутлӑ ҫуртри ҫынсене эвакуациленӗ.
Ҫитес вӑхӑтра Шупашкарта темиҫе троллейбус тата автобус хӑйсен маршрутне улӑштарӗҫ.
12-мӗш автобус Мускав проспекчӗпе вӗҫне ҫитиех каймӗ – Максим Горький проспекчӗ еннелле пӑрӑнӗ. 22-мӗш автобус Арҫынсен ҫветтуй троица мӑнастирӗ таран ҫӳреме пуҫлӗ. Ҫак автобуссен маршручӗсем утӑ уйӑхӗн 27-мӗшӗнчен улшӑнӗҫ.
10-мӗш троллейбус Яковлев проспекчӗпе кайса Эгер бульварне кӗрӗ, унтан Роза Люксембург урамне ҫитӗ. Кунашкал ҫул валли тепӗр 5 троллейбус кирлӗ пулӗ.
Асламас урамӗнчи ҫула туса пӗтерсен 35-мӗш автобус «Хӗвеллӗ» микрорайона кӗме тытӑнӗ. Ҫак улшӑнусем ҫурла уйӑхӗнчен пулӗҫ.
Шупашкарта Мир проспектӗнчи пӗр ҫуртра ӗнер, утӑ уйӑхӗн 18-мӗшӗнче, чутах пысӑк инкек пулман. 4 ҫулти ача виҫҫӗмӗш хутри чӳречерен урамалла тухса ӳкнӗ. Юрать, пӗчӗкскер вилмен, ӑна пульницӑна илсе кайнӑ.
Ачан хырӑмӗ тӗлӗнче суранланнӑ. Унӑн пурнӑҫӗ хӑрушлӑхра мар. Вырӑна васкавлӑ медпулӑшу ҫитнӗ, арҫын ачана пульницӑна сипленме илсе ҫитернӗ.
Аса илтерер: ҫӗртме уйӑхӗн 24-мӗшӗнче Шупашкарта ҫурҫӗр-хӗвеланӑҫ районӗнче 2-ри ача 17-мӗш хутран ӳксе вилнӗ. Кун пирки сайтра хыпарланӑччӗ.
Шупашкарта пурӑнакан 63 ҫулти арҫын прокуратурӑран пулӑшу ыйтнӑ. Коллекторсем унӑн хӗрӗнчен парӑм шыраса илме хӑтланнӑ-мӗн.
Суд приставӗсем ҫийӗнчех тӗрӗслев ирттернӗ. Чӑнах та, коллекторсем саккуна пӑсса парӑма шыраса илессишӗн тӑрӑшнӑ. Арбитраж сучӗ Мускаври «Сентинел Кредит Менеджмент» тулли мар яваплӑ обществӑна явап тыттарма йышӑннӑ. Вӑл парӑма шыраса илнӗ чухне ҫынсен прависемпе интересӗсене пӑснӑ тесе палӑртнӑ.
Судья «Сентинел Кредит Менеджмент» тулли мар яваплӑ обществӑна 100 пин тенкӗлӗх штрафлама йышӑннӑ. Приговор палӑртнӑ чухне общество административлӑ майпа пӗрре мар явап тытнине те шута илнӗ.
Сире те коллекторсем шӑнкӑравласа халтан яраҫҫӗ-и? Ӗҫ кунӗсенче 8 (8352) 30-60-01 номерпе шӑнкӑравласа пӗлтерӗр.
Утӑ уйӑхӗн 17-мӗшӗнче 20 сехетре Шупашкарта пурӑнакан хӗрарӑм Йошкар-Олара вӑрманта ҫухалса кайсан «112» номерпе шӑнкӑравланӑ та ҫул тупайманни пирки пӗлтернӗ.
Линин тепӗр вӗҫӗнче специалистсем ӑна кӗҫех ҫӑлавҫӑсемпе ҫыхӑнтарассине каланӑ. Ҫакна илтсен 53 ҫулти хӗрарӑм пулӑшу кирлӗ маррине пӗлтернӗ. Вӑл вӑрманта вӑй пухать-мӗн.
Тепӗр кун ирхине 5 сехетре ҫак хӗрарӑмран ҫӑлав службине шӑнкӑрав килнӗ. Хальхинче ҫӑлавҫӑсем вырӑна пур-пӗрех тухнӑ. Кӳршӗ республикӑри вӑрманта ҫухалса кайнӑ ентешӗмӗре ирхине 6 сехетре тупнӑ.
+15.3 °C