medicin.cap.ru сӑнӳкерчӗкӗ

Чӑваш Ене пневмококран вакцина кӳрсе килнӗ. Пурӗ — 5 830 доза.

«Пневмовакс-23» ятлӑ вакцина пневмококк инфекцийӗн 23 серотипӗнчен хӳтӗлет иккен. Ҫав шутра — пневмонирен (ӳпке шыҫни), отитран (хӑлха шыҫни), ҫӗрекен менингитран (пуҫ мими шыҫни), эндокардитран (эндокарди шыҫни), артритран (шӑмӑ чирӗ) тата ытти чӗр-чӗртен.

Вакцинӑна 2 ҫултан иртнӗ ачасенчен пуҫласа тӑваҫҫӗ. Препарата республикӑн сывлӑх сиплев учрежденийӗсене валеҫсе панӑ.

Стопкоронавирус.рф сайтри сӑн

Чӑваш Енре кӑшӑлвируспа чирлекен сахалланнӑ. Чӑннипе, Раҫҫейӗпех ҫапла.

Юпан 17-мӗшӗнче республикӑра 49 ҫын кӑшӑлвируспа чирленӗ. Ку, авӑн уйӑхӗн варрипе танлаштарсан, 10 хут сахалрах. Инфекциленнисенчен ытларахӑшӗ – 50 ҫултан аслӑраххисем.

Юлашки вӑхӑтра чирлекенсен йышӗнче вилекен, пульницӑра сипленекен сахалланнӑ. Иртнӗ талӑкра 1 ҫын вилнӗ, 49 ҫын инфекциленнӗ. Сывалакансем нумаййӑн пулнӑ: 122 ҫын.

Шӑмӑршӑ районӗнчи Анат Чаткас ялӗнче врач амбулаторийӗ уҫӑлнӑ. Унта Тури Чаткас, Хӗрлӗ Васан, Максим Горький ялӗсенчи ҫынсем ҫӳрӗҫ.

Тӗрӗссипе, амбулаторие ҫуркунне вӗҫӗччен туса пӗтермелле пулнӑ. Анчах вӑл юпа уйӑхӗн 14-мӗшӗнче ҫеҫ хӑйӗн алӑкне уҫнӑ.

ЧР Сывлӑх сыхлавӗн министерстви пӗлтернӗ тӑрӑх, амбулаторие 1,2 пин ҫын пулӑшу илме пырӗ.

cap.ru сайтри сӑн

19 ҫулти хӗр чутах суккӑр юлман. Вӑл Республикӑри офтальмологи клиника пульницине пынӑ чухне куҫ ҫивӗчлӗхӗ 1 процент кӑна юлнӑ.

Хӗр линзӑпа ҫӳренӗ. Ӑна вӑхӑтра улӑштарманран унӑн куҫӗ шыҫӑннӑ. Вӑл ыратма тытӑннӑ, куҫ ҫивӗчлӗхӗ чакса пынӑ. Хӗр пульницӑна пынӑ та ӑна часрах стационара вырттарнӑ.

Стационарта выртсан унӑн куҫ ҫивӗчлӗхӗ 50 процента ҫитнӗ. Тухтӑрсем юлашки вӑхӑтра ҫак чирпе аптаракан нумай пулнине палӑртаҫҫӗ. Ку линза тӑхӑннипе ҫыхӑннӑ.

Чӑваш Ене кӑшӑлвирусран хӳтӗленмелли 7 пин ытла доза вакцина илсе килнӗ. Ӑна «Фармаци» складне илсе ҫитернӗ. Кӗҫех пульницӑсене салатӗҫ. Вакцина – «Гам-Ковид-Вак» ятлӑскер.

Сӑмах май, кӑшӑлвируспа чирлекенсем ытлах нумай мар. Юлашки талӑкра 36 ҫын инфекциленнине палӑртнӑ. Ҫурла уйӑхӗн 12-мӗшӗ тӗлне Чӑваш Енри 693251 ҫын вакцинацин икӗ тапхӑрӗ витӗр тухнӑ. Хальхи вӑхӑтра коллекти иммунитечӗ 7,9 процентпа танлашать.

chuvashia.sledcom.ru сӑнӳкерчӗкӗ

Чӑваш Енре пурӑнакан пӗр хӗрачана куҫӗ начар курнӑран ишме ҫӳреме хӗсӗрленӗ. Кун пирки РФ Следстви комитечӗн Чӑваш Енри управленийӗнче иртнӗ йышӑнура калаҫу пулса иртнӗ.

Унта сусӑр ачан амӑшӗ тата тренерӗ пынӑ. Хӗрача ишессипе тренировкӑсене ҫӳрет иккен. Ҫак енӗпе вӑл юлашки тӑватӑ ҫул тӑрӑшать. Раҫҫей ӑмӑртӑвӗсемпе чемпионачӗсенче те вӑл пӗрре кӑна мар палӑрнӑ. Анчах ача тренировкӑсене ҫӳрекен вӗренӳ заведенийӗсенче педагогсемпе тренерсем хӗсӗрлеме хӑтланнӑ.

Йышӑнӑва тӗрлӗ шайри тӳре-шарана чӗнсе илнӗ. Ҫав шутра вӗренӳ министрӗ Дмитрий Захаров, спорт министрӗ Василий Петров, Шупашкар хула администрацийӗн вӗренӳ управленийӗн ӗҫченӗсем пулнӑ.

Ачана хулари спорт комплексӗсенчен пӗрне тӳлевсӗр ҫӳретме калаҫса татӑлнӑ. Чӑваш Енри Следстви управленийӗ сусӑр ачапа ҫыхӑннӑ ыйтӑва тӗрӗслесе тӑма шантарнӑ.

sochi-news.net сайтран илнӗ сӑн

Tech Like This кӑларӑм электронлӑ хатӗрсем ҫывӑракан ҫын ҫине мӗнле витӗм кӳнине тӗпченӗ 20 ӑслӑлӑх тӗпчевне тишкернӗ. Кроватьпе юнашар смартфон выртнӑ чухне ыйхӑ пахалӑхӗ чакать иккен. Хӑй телефонӗпе усӑ курман пулсан та.

Сӑмахран, 48% яхӑн ҫын ҫывӑрма выртас умӗн смартфона кроватьпе юнашар хурать.

Телефонпа юнашар ҫын сахалрах ҫывӑрать, ыйхи те унӑн ытла тарӑнах мар. Кӑнтӑрла ӑна ыйхӑ пусарать, ӗҫре унӑн тухӑҫлӑхӗ чакать.

Смартфона ҫывӑрмалли пӳлӗмрен пӗр уйӑхлӑха илсенех ыйхӑ пахалӑхӗ ӳсет. Ҫак тапхӑрлӑха ҫавӑн пекех ҫывӑрма выртас умӗн гаджетпа усӑ курассине чакарсан, ҫыннӑн ытти чылай процесӗсем йӗркене кӗрӗҫ: тӗслӗхрен, ӗҫленӗ чухне усӑ куракан астӑвӑм е хаваслӑ туйӑм кӑтартма пултарасси.

vk.com/vkugesi илнӗ сӑнӳкерчӗк

Тӗнче тетелӗнчи халӑх ушкӑнӗсенчен пӗринче Шупашкар районӗнчи тӗп больницӑн ача-пӑча уйрӑмне кӗмелли алӑкран инҫех мар лапамра пӗри пирус туртни пирки пӗлтернӗ. «Кӗнӗ ҫӗрте тата ача-пӑча кӳмисемпе юнашар тӑрса туртни йӗркеллӗ япалах-и?» — ҫырса хунӑ постра ятне пытарма ыйтнӑ ҫын.

Ача-пӑча кӳмисемпе юнашар тӑрса пирус туртакан хӗрарӑм — шурӑ халатлӑскер.

Поста курнисен хушшинче шурӑ халатлине хӳтӗлекенсем те пур. Вӗсенчен пӗри, Наталия Александрова ятлӑ этем, пост авторне ятласа пӗтернӗ, ӑна вӑл усал тата телейсӗр ҫын тесе кӳрентернӗ, ансатрах пулма сӗннӗ.

Ҫав вӑхӑтрах район больницин администрацийӗ пост авторӗнчен каҫару ыйтнӑ. Сывлӑх сыхлав учрежденийӗнче ӗҫлекенсемпе пирус сиенӗ тата больница ҫывӑхӗнче туртни килӗшӳсӗрри пирки калаҫу ирттернине хыпарланӑ.

Юпа уйӑхне хӗрарӑмсен кӑкӑр ракӗпе кӗрешмелли пӗтӗм тӗнчери уйӑхлӑх тесе йышӑннӑ.

Республикӑн онкологи диспансерӗнче пӗлтернӗ тӑрӑх, пирӗн ҫӗршывра ҫак органӑн усал шыҫҫине ҫулсерен 70 пин хутчен тупса палӑртаҫҫӗ. Юлашки 15 ҫулта ку чирпе чирлекенсен шучӗ икӗ хут ытла ӳснӗ.

Чӑваш Енре кӑкӑр ракне ҫулсерен 400 ытла хутчен тупса палӑртаҫҫӗ. Кӑҫалхи ҫур ҫулта палӑртнӑ 252 тӗслӗхрен 185-шӗнче чир 1-2-мӗш стадире пулнӑ.

Хӗрарӑмсен кӑкӑр ракне тупса палӑртассипе ҫак уйӑхра пирӗн республикӑра тӗрлӗ мероприяти ирттерӗҫ.

pozdravs.ru сӑнӳкерчӗкӗ

Юпа уйӑхӗн 1-мӗшӗнче пӗтӗм тӗнчере Ваттисен кунне уявлаҫҫӗ те, Чӑвашстат ҫавӑн умӗн пирӗн республикӑри ватӑ ҫынсен йышне тишкернӗ.

2022 ҫул пуҫламӑшӗ тӗлне пирӗн республикӑра пурӑнакансен 24 проценчӗ, е 290 пин ҫын, аслӑ ӑрурисем шутланнӑ. Карчӑксен йышӗ арҫынсенчен 2,4 хут ытларах.

Раҫҫей Пенси фончӗн Чӑваш Енри уйрӑмӗ хыпарланӑ тӑрӑх, тивӗҫлӗ канурисен шучӗ 358 пинпе танлашать. Вӗсенчен 5 пине яхӑн ҫын – 90-99 ҫулсенчисем. Вӑрӑм ӗмӗрлисем Шупашкарта, Патӑрьел, Елчӗк тата Сӗнтӗрвӑрри районӗсенче йышлӑ. 100 ҫултан иртнисен шучӗ – 47.

Аслӑ ӑрурисем те ҫемье ҫавӑраҫҫӗ. Иртнӗ ҫул 88 ватӑ мӑшӑрланнӑ.