Вӑрнар округӗнче пурӑнакан хӗрарӑм кӗтӳ пӑхма кайсан ҫухалнӑ. Ӑна тӑватӑ кун шыранӑ.
Нина Степановна Зубова ҫухални пирки юпа уйӑхӗн 17-мӗшӗнче пӗлтернӗ. Ун патне тӑванӗсем шӑнкӑравласа ҫитеймен. Тивӗҫлӗ канури хӗрарӑма полицейскисем, нимеҫӗсем шыранӑ.
Тӑваттӑмӗш кунхине вӑл хӑйех ҫул тупса сукмак ҫине тухнӑ. Унта ӑна водитель асӑрханӑ та киле илсе ҫитернӗ.
Кинемей кайран ҫапла каласа кӑтартнӑ: пӗрремӗш кун вӑл сунарҫӑ пӳртӗнче ҫӗр каҫнӑ, кайран – вӑрманта. Вӑл ӑна шыранӑ ҫынсен сассисене илтнӗ. Анчах урипе аптӑранӑран вӗсем патне ҫитеймен. Халӗ хӗрарӑм пульницӑра.
Вӑрнар округӗнчи Ҫӗнӗ Мӗлӗш ялӗнче пурӑнакан Николайпа Зоя Степановсене «Юратупа шанчӑклӑхшӑн» орденпа чысланӑ. Вӗсем кӑҫал кервен туя паллӑ тунӑ.
Николай Ивановичпа Зоя Степановна пӗр-пӗрне ачаран пӗлеҫҫӗ, пӗр шкулта вӗреннӗ. Унтан Зоя техникумра ветеринара вӗреннӗ, Николай салтака кайса килнӗ, колхозра ӗҫленӗ. Кайран Зоя та унта ӗҫлеме пынӑ.
Степановсем икӗ ывӑл ҫуратса ӳстернӗ.
Чӑваш патшалӑх ял хуҫалӑх академине (халӗ аграри университечӗ) 20 ҫул ытла ертсе пынӑ Николай Кириллов пурнӑҫран уйрӑлнӑ. Вӑл тин кӑна 76 ҫул тултарнӑ, иккӗмӗш кунхине вилнӗ.
Николай Кириллов 1945 ҫулта Вӑрнар районӗнчи Авруй ялӗнче ҫуралнӑ. Ял хуҫалӑх академине вӑл 1980 ҫулта ӗҫлеме килнӗ. Аслӑ шкула 1991-2012 ҫулсенче ертсе пынӑ.
Николай Кирилловпа юпан 10-мӗшӗнче Чӑваш патшалӑх аграри университетӗнчи акт залӗнче 12 сехет ҫурӑра сыв пуллашӗҫ.
Тверь облаҫӗнчи Васькино яле ҫывӑхӗнче шыравҫӑсем 1941 ҫулта вилнӗ салтакӑн, Чӑваш Енре ҫуралнӑскерӗн, ӳт юлашкисене тупнӑ. Ҫак кунсенче вӗсем унӑн ывӑлӗпе тӗл пулса ашшӗн медальонне панӑ.
Ҫак салтак Иван Васильевич Волков Вӑрнар районӗнчи Мӑн Явӑш ялӗнчен пулнӑ, 1910 ҫулта ҫуралнӑ. Вӑл стрелоксен дивизийӗнче ҫапӑҫнӑ.
Ывӑлӗ Владимир Иванович ашшӗне астумасть. Анчах унӑн вӑл 1933 ҫулта ҫырнӑ ҫырӑвӗ пур. Ӑна тата медальон бланкне танлаштарнӑ та – пӗр почерках. Ҫапла салтак унӑн ашшӗ пулнине палӑртма май килнӗ.
Вӑрнар округӗнчи тӗп пульницӑна ҫӗнӗ ҫамрӑк специалистсем ӗҫлеме килнӗ. Нумаях пулмасть унта рентгенолог Дмитрий Куликов тата Юлия Ефимова терапевт ӗҫе вырнаҫнӑ.
Дмитри диплом илнӗ хыҫҫӑн васкавлӑ медпулӑшу пульницинче ӗҫленӗ. Ординатурӑра рентгенологи енӗпе икӗ ҫул вӗренсен тӑван поселокне таврӑннӑ.
Юлия вара университет хыҫҫӑн «Ял тухтӑрӗ» программӑпа усӑ курса Вӑрнар поселокне ӗҫлеме килнӗ. Унӑн участокӗнче 2 пине яхӑн ҫын пурӑнать.
Вӑрнар округӗнче Ҫӗнӗ ҫул тӗлне тивӗҫлӗ канури 6 ҫын пенси укҫине илеймен. Мӗншӗн тесен ӑна почта уйрӑмӗн пуҫлӑхӗ /халӗ вӑл ӗҫлемест/ хӑйен кӗсйине чикнӗ.
Судра палӑртнӑ тӑрӑх, 2023 ҫулхи раштавран пуҫласа 2024 ҫулхи кӑрлаччен ҫак пуҫлӑх вӗсемшӗн хӑй алӑ пусса укҫине хӑй илнӗ. Пӗтӗмпе – 197 пине яхӑн тенкӗ.
50 ҫултискер ҫапла тунине прокуратура палӑртнӑ. Пуҫиле ӗҫ пуҫарсан ӑна ӗҫрен кӑларнӑ. Судра вал айӑпне йышӑннӑ, тӑкака саплаштарнӑ. Ӑна тӗрмене хупмасӑр 1 ҫуллӑха айӑпланӑ.
Вӑрнар округӗнчи Кульцав ялӗнче пурӑнакан Александр Ивановичпа Галина Николаевна Зотовсем ылтӑн туя паллӑ тунӑ.
Александр Иванович салтакра пулнӑ хыҫҫӑн тӑван ялне таврӑннӑ, Ленин ячӗллӗ колхозра водительте ӗҫленӗ. Кунтах юратӑвне тӗл пулнӑ вӑл. Каччӑ ял хуҫалӑх институтӗнче зооинженери факультетӗнче ӑс пухнӑ, профком председателӗ пулнӑ. Галина Николаевна чылай ҫул вырӑнти депутат пулнӑ.
Зотовсем ывӑлпа хӗр ӳстернӗ. Халӗ вӗсем виҫӗ мӑнукӗпе, пӗр кӗҫӗн мӑнукӗпе савӑнса пурӑнаҫҫӗ.
Ҫурла уйӑхӗн 19-мӗшӗнче Чӑваш Енре 43 ҫулти икӗ арҫын пушарта ҫунса вилнӗ. Пӗрремӗш инкек Вӑрнар округӗнчи Ершепуҫ ялӗнче пулнӑ. Ҫӑлавҫӑсем йывӑҫ ҫуртри пушара сӳнтернӗ хыҫҫӑн арҫын виллине тупнӑ. Халӗ ҫулӑм мӗнрен тухнине тӗпчеҫҫӗ.
Ҫав кунах 23 сехетре Шупашкарта Ленин проспектӗнчи 56-мӗш ҫуртра хваттер ҫуннӑ. Унта та 43-ри арҫын вилнӗ. Малтанлӑха пӗлтернӗ тӑрӑх, ҫулӑм пирус асӑрханмасӑр туртнӑран тухнӑ.
Вӑрнар муниципаллӑ округӗнче йӗрке хуралҫисем комбайнера чарнӑ. Вӑл ӳсӗр пулнӑ.
Комбайн «Шупашкар - Сурски» автоҫулпа пынӑ.
Сӑмах май, пӗлтӗр раштав уйӑхӗнче «Комсомольски - Елчӗк - Пӑва» ҫул ҫинче инспекторсем трактор-погрузчике чарнӑ. Водитель ӗҫ хыҫҫӑн базӑна таврӑннӑ. 53 ҫулти водитель ӳсӗр пулнӑ. Ку кӑна мар, унччен ӳсӗрле руль умне ларнӑшӑн унӑн правине те туртса илнӗ пулнӑ.
Республикӑри 10 округ Сосновский пултӑранӗпе кӗрешме хушма укҫа ыйтнӑ. Вӗсен йышӗнче - Улатӑр, Вӑрнар, Йӗпреҫ, Канаш, Куславкка, Комсомольски, Хӗрлӗ Чутай, Етӗрне, Елчӗк, Патӑрьел округӗсем. Вӗсене пӗтӗмпе 4,5 миллион тенкӗ уйӑрса парӗҫ. Ку укҫапа 2,85 тӑваткал ҫухрӑм лаптӑк ҫинчи Сосновский пултӑранне пӗтерме май парӗ.
Палӑртмалла: ҫулталӑк пуҫланнӑранпа ҫак наркӑмӑшлӑ курӑкпа кӗрешме 11,4 миллион тенкӗ уйӑрнӑ.
+5.3 °C