Чӑваш Республикин ял хуҫалӑх министрӗн пӗрремӗш ҫумне Марина Загребаевӑна ӗҫрен кӑларнӑ. Халӗ Сергей Артамонов министрӑн икӗ ҫум: Инна Волкова тата Алина Семенова — юлнӑ.
Канашри финанс техникумӗнче бухгалтер-финансиста, Потребкооперацин Мускаври университетӗнче экономиста, Атӑл-Вятка академийӗнче менеджера вӗреннӗ Марина Загребаева министерствӑра 2016 ҫулхи авӑн уйӑхӗнченпе ӗҫленӗ. Ӗҫ биографине Куславкка районӗн администрацийӗнче финанс пайӗнчи экономистран пуҫланӑ. Республикӑн Финанс министерствинче тӗрлӗ должноҫре тӑрӑшнӑскер унта та министр ҫумӗ пулнӑ.
Канаш районӗнчи пӗр тӑвансем фермер хуҫалӑхӗ йӗркеленӗ. Чӑваш Республикин ял хуҫалӑх министрӗ Сергей Артамонов Фейсбукра пӗлтернӗ тӑрӑх, Кармами Выҫҫӑлкки ялӗнчи фермерсемпе вӑл ӗнер, нарӑс уйӑхӗн 19-мӗшӗнче, тӗл пулнӑ.
Андрей, Сергей, Виктор, Иван Николаевсем 100 пуҫ ӗне выльӑхлӑх ферма уҫас тенӗ. Сергей Николаев министра каланӑ тӑрӑх, фермер хуҫалӑхне уҫас ӗмӗт тахҫанах амаланнӑ. Палӑртнине пурнӑҫа кӗртме «Ҫемье выльӑх-чӗрлӗх фермине йӗркелесси тата аталантарасси» программӑна хутшӑнни май панӑ. Фермер хуҫалӑхӗ ятарлӑ конкурс витӗр тухса 10 миллион тенкӗ гранта тивӗҫнӗ.
Чӑваш Ени ял хуҫалӑх предприятийӗсем севок сухан туса илессипе ҫине тӑраҫҫӗ.
Ку культурӑна ӳстерме пулӑхлӑ хура тӑпра кирлӗ. Ҫавӑнпа севок туса илессипе республикӑн кӑнтӑр енче: Елчӗк, Патӑрьел, Комсомольски районӗсенче — тӑрӑшаҫҫӗ. Раҫҫейре туса илекен севокран 68,8 проценчӗ — Чӑваш Ен аграрийӗсен тӳпи. Ҫакӑн пек ӗнентерет республикӑн Ял хуҫалӑх министерстви.
Ял хуҫалӑх предприятийӗсем хӑйсен продукцине ют регионсене ҫеҫ мар, чикӗ леш енне те ӑсатаҫҫӗ. Чӑваш суханне пӗлтӗр Беларуҫ Республикинче, Казахстанра, Молдавинче туяннӑ. Пурӗ 87,46 пин америка долларӗлӗх.
Чӑваш Енӗн ял хуҫалӑх министрӗн ҫумӗ пулма Алина Семеновӑна ҫирӗплетнӗ. Маларах вӑл республикӑн Финанс министерствинче бюджет политикин пайӗн пуҫлӑхӗнче ӗҫленӗ. Ял хуҫалӑх министрӗн ҫумӗн пуканӗ пӗлтӗрхи юпа уйӑхӗнче Сергей Лисицын ӗҫрен кайнӑ хыҫҫӑн пушаннӑ.
Алина Семенова хӑй вӑхӑтӗнче «Чӑвашавтотранс» предприятин финанспа хуҫалӑх тӑрӑмне тӗрӗслеме те хутшӑннӑ-мӗн.
Халӗ республикӑн ял хуҫалӑх министрӗн Сергей Артамоновӑн виҫӗ ҫум: Марина Загребаева, Инна Волкова тата Алина Семенова.
Чӑваш Енри аграрирсем хӑйсем туса илекен хура тула Бельгие ӑсатаҫҫӗ. Кун пирки республикӑн Ял хуҫалӑх министерстви пӗлтерет.
Асӑннӑ культурӑна Бельгие пирӗн тӑрӑхран раштав уйӑхӗнче сутма тытӑннӑ. Ҫак кунсенче унта 380 тонна ӑсатнӑ. Пӗтӗмпе 700 тонна сутмалла. Хуратула маларах Польшӑпа Германие ӑсатнӑ.
Раҫҫейӗн Ял хуҫалӑх министерстви пӗлтернӗ тӑрӑх, раштав уйӑхӗн 13-мӗшӗ тӗлне Чӑваш Енри аграрисем 33,1 миллион долларлӑх (пӗлтӗрхи ҫав тапхӑртинчен 25,7 процент нумайрах) продукци экспорта янӑ. Ку вӑл — Европа Союзне кӗрекен ҫӗршывсене шута илмесӗр.
Чӑваш Енӗн Ял хуҫалӑх министерстви предприятисен пуҫлӑхӗсем пулма кадр резервне кӗртмелли кандидатсене шыраса тупнине пӗлтернӗ.
«Агро-Инновации» хысна учрежденийӗн пулас ӗмӗтлӗ ҫыннӑн агропромышленность комплексӗн отраслӗсенчи специальноҫлӑ пулмалла тата ҫав енӗпе 3 ҫултан кая мар ӗҫлени кирлӗ. Асӑннӑ предприяти пуҫлӑхӗ пулмашкӑн кадр резервне Николай Васильева кӗртнӗ.
«Нива» вӗренӳ центрӗн пуҫлӑхӗ пулмалли ҫынна та кадр резервне кӗртессине пӗлтернӗ. Ӑҫта вӗренни, ӗҫ опычӗ «Агро-Инновации» предприяти валли пекех: АПКра ӗҫлеме юрӑхлӑ пӗлӳ тата 3 ҫултан кая ӗҫ опычӗ пулмалла. Кун пек ҫын тесе Николай Якимов тесе йышӑннӑ.
Раҫҫейӗн ял хуҫалӑх министрӗн пӗрремӗш ҫумӗ Джамбулат Хатуов Чӑваш Енӗн ял хуҫалӑх министрӗн Сергей Артамоновӑн ӗҫне пысӑка хурса хакланӑ. Кун пирки вӑл паян, авӑн уйӑхӗн 29-мӗшӗнче, республикӑн Правительство ҫуртӗнче Олег Николаев Элтеперпе ирттернӗ тӗлпулура каланӑ.
«Сергей Геннадьевич ӗҫе малалла тӑсни пушшех те кӑмӑллӑ. Ӑна шаннишӗн сире тав тӑватӑп. Пирӗн шутпа, вӑл — ӗҫлеме чи хатӗр министрсенчен пӗри», — тенӗ Мускавран килнӗ хӑна.
Сергей Артамонов федерацин Атӑлҫи округӗнчи субъектсенчи чи лайӑх виҫӗ министр, Раҫҫейри чи лайӑх 20 министр шутне кӗрет иккен.
Чӑваш Енри ял хуҫалӑх предприятийӗсенче уй-хир пушаннӑ май кӗрхисем валли ҫӗр хатӗрлессипе ҫине тӑраҫҫӗ. Хальлӗхе 45,4 пин гектар сухаланӑ.
Сӑмах май, республикӑри 11 районта вырмана тухнӑ. Паянхи кун тӗлне илсен пӗрчӗллӗ тата пӑрҫа йышши культурӑсене 4,7 пин тонна ҫапса тӗшӗленӗ, тухӑҫ кашни гектартан вӑтамран 36,1 центнер тухать. Чӑваш Ен Ял хуҫалӑх министерствинче пӗлтернӗ тӑрӑх, пӗлтӗр гектартан 26,2 центнера ларнӑ.
Елчӗк районӗнче ҫӗр улми кӑларма тытӑннӑ, Куславккапа Хӗрлӗ Чутай районӗсенче пахча ҫимӗҫ пухса кӗртессипе ӗҫлеҫҫӗ.
Хуҫалӑхсем выльӑх апачӗ хатӗрлессипе те ҫине тӑраҫҫӗ. Пӗр ҫул тата нумай ҫул ӳсекен курӑкран утӑ, сенажпа силос хатӗрлеҫҫӗ. Муркаш районӗнче витаминлӑ утӑ ҫӑнӑхӗ 170 тонна янтӑланӑ.
Иртнӗ эрнере пирӗн республика утӑ сутассипе Раҫҫейре мала тухнӑ. Чӑваш Енри аграрисем кӑҫалхи ҫур ҫулта 440 тонна утӑ Америкӑри Пӗрлешӳллӗ Штатсенчи 158,3 пин долларлӑх сутнӑ.
Люцерна, вика (тӑрна пӑрҫи), клевер, кашкӑр пӑрҫи вӑррине тата ӳсентӑрана вӗтетсе миххе тултарса Бельгине, Германие, Польшӑна тата Словение ӑсатнӑ.
Кӑҫалхи пӗрремӗш ҫур ҫулта пирӗн республикӑран агропромышленность продукцине 11,8 миллион долларлӑх ӑсатнӑ. Ку вӑл пӗлтӗрхи танлаштаруллӑ тапхӑртинчен 10,3% нумайрах.
2024 ҫул тӗлне пирӗн тӑрӑхри аграрисен экспорта 46 миллион долларлӑх продукци ӑсатма тытӑнмалла. Чӑваш Ен Ял хуҫалӑх министерстви пӗлтернӗ тӑрӑх, ку цифрӑна республикӑн наци пррекчӗпе килӗшӳллӗн пӑхса хӑварнӑ.
Пирӗн республикӑра пурӑнакансем кӑҫал, мӗнпур ҫӗршыври пекех, пӗчӗк процентлӑ ипотека илеҫҫӗ. Вӑл укҫана ялта ҫурт-йӗр тума яраҫҫӗ.
Чӑваш Ен вице-премьерӗ – ял хуҫалӑх министрӗ Сергей Артамонов Фейсбукра пӗлтернӗ тӑрӑх, пирӗн тӑрӑхри 203 ҫемье 297,1 миллион тенкӗлӗх кредит илнӗ.
Пӗчӗк процентлӑ кредит илес ӗмӗтлисем Россельхозбанка 390 заявка панӑ. Кивҫен укҫана вӗсем 794 миллион тенкӗлӗх илесшӗн. Кредит учрежденийӗ заявкӑсене малалла йышӑнать.
Аса илтерер: пирӗн республикӑри ялсенче ҫурт тӑвас ӗмӗтлисене Чӑваш Ен хысни шучӗпе те процент ставкине пӗчӗклетсе параҫҫӗ. Кивҫен укҫана халӑхӑн хӑш-пӗр категорине 3 процентлӑ ставкӑранн пуҫласа 0,1 процент таран виҫепе пама йышӑннӑ.
+13.3 °C