Пирӗн ентеш — __Яманакӑн__ пултаруллӑ арӗ — __Эдисон Патмар__ кӗнеке хыҫҫӑн кӗнеке калӑплать.

Шупашкарти «Ҫӗнӗ вӑхӑт» издательствӑра нумаях пулмасть унӑн 140-мӗш кӗнеки 1500 экземпляр тиражпа пичетленсе тухрӗ. Иккӗмӗш авторӗ — ашшӗ — чӑваш халӑх сӑмахлӑхне пухассипе палӑрнӑ __Иван Анисимович Патмар__.

Сӑмах май, ҫак ӗҫ — Патмарсен пуххинчи 10 томлӑ халӑх сӑмахлӑхӗн 7-мӗш томӗ. 228 страницӑран тӑракан илемлӗ те хытӑ хуплашкаллӑ кӗнекен умсӑмахӗнче ку тома чӑваш арҫынӗсене халалланине асӑннӑ. Хайлавсенче салтакӑн ҫӑмӑл мар пурнӑҫӗ пирки тӗплӗн ҫырса кӑтартнӑ. Урӑхла пулма та пултараймасть, мӗншӗн тесен Эдисон Иванович хӑй те салтак пӑттине тутаннӑ, 20 ҫул ытла ҫар хӗсметӗнче пулнӑ. Ашшӗ — Иван Анисимович вара — иртнӗ хаяр вӑрҫа хутшӑннӑ, старшина, тӑватӑ хутчен аманнӑ, икӗ хут — Хӗрлӗ Ҫӑлтӑр орденне, «Паттӑрлӑхшӑн», «Варшавӑна ирӗке кӑларнӑшӑн» тата ытти медальсене тивӗҫнӗ. «Эх, мӑнтарӑн, нушалантӑн, ҫавах ырӑ пулаймарӑн, хӑв ятна сыхлаймарӑн...» пая шӑпах унӑн асаилӗвӗсене кӗртнӗ.

«...Ҫӳлтен кӗркуннехи курак кӗтӗвӗ пек фашист самолечӗсем пуҫ тӑррине бомбӑсем акаҫҫӗ. Витререн шыв тӑкнӑ пек мина, снаряд тӑкӑнать. Пуҫа йӑтса сывлама ҫук, тар, тӗтӗм шӑрши. Ротӑран виҫӗ салтак кӑна юлтӑмӑр...», — ҫырнӑ И. Патмар хӑйӗн алҫырӑвӗсенче. Кунтах сӑвӑсем те пур:

~~«...Хавшак тесе ан шутлӑр,

Ура амансан аллӑм пур,

Ал амансан шур шӑл пур...»~~

«Чӑваш салтакӗ Аслӑ Отечественнӑй вӑрҫӑ вӑхӑтӗнче» тата ытти пайсенче те вуласа пӗлмелли сахал мар. Историлле страницӑсене те, салтак юррисене те вырӑн панӑ. Кӗнекене сӑнӳкерчӗксем те илемлетеҫҫӗ.

Ман шутпа, ҫак кӗнекене вулакана сӗнсе авторсем халӑхшӑн питех кирлӗ ӗҫ тунӑ. Унӑн пӗлтерӗшӗ ҫамрӑк ӑрӑва патриотла воспитани парас ҫӗрте те калама ҫук пысӑк.