Ӗнер, юпан 27-мӗшӗнче, Я. Ухсай культура керменӗнче Канаш районӗн «Канашсем» ентешлӗхӗ 18-мӗш хут пухӑнчӗ. Тӗп вырӑнта — __Анатолий Кипеч__ (вӑл ҫак районтан, ентешлӗхӗн ертӳҫи) ҫыравҫӑ 75 ҫул тултарни пулчӗ.

Мероприятие __Лидия Филипповӑпа__ (президиум пайташӗ) __Вячеслав Оринов__ ертсе пычӗҫ. Сӑмах тухса калакансем шутӗнче Канаш район администрацийӗн пуҫлӑх ҫумӗ Анатолий Егоров, Федераллӑ казначействӑн Чӑваш Республикинчи управленийӗн пуҫлӑхӗ Ирина Клюкова, федерацин укҫа-тенкӗпе хыснан тӗрӗслев службин Чӑваш Республикинчи вырӑнти управлени ертӳҫи Нина Константинова, Патшалах канашӗн депутачӗсем, ытти районсен етлешлӗх ертӳҫисем пулчӗҫ.

Уявра юрӑ-ташӑпа Энрияль фольклор ушкӑнӗ, Канаш районӗн культура ҫурчӗ ҫумӗнчи «Ентешсем» ансамбль, «Янташ» эстрада ансамблӗ (ертӳҫи — А.Никитин), культура училищин студенчӗсем савӑнтарчӗҫ. Ҫавӑн пекех пухӑннӑ халӑхӑн кӑмалне ҫӗклерӗҫ — Зоя Лисицына, Тамара Гурьева, Юрий Григорьев, Елена Османова, Константин Ефремов, Валентина Смирнова тата ытти юрӑҫсем.

**__Анатолий Кипеч__** — чӑваш ҫыравҫи, сӑвӑҫи, драматургӗ, __Канаш районӗнчи__ __Чулкӑмакара__ ҫуралнӑ. РФ ҪП членӗ, Чӑваш АССРӗн тава тивӗҫлӗ культура ӗҫченӗ.

Канаш педагогика училищинче, Чӑваш педагогика институтӗнче, СССР педагогика ӑслӑлӑхӗсен академийӗсенче пӗлӳ илнӗ. Чӑваш патшалӑх университетӗнче философи кафедрин доценчӗ пулса ӗҫленӗ. Халӗ Чӑваш патшалӑх педагогика университетӗнче ӗҫлет.

Анатолий Кипеч «Ӗмӗр сакки сарлака», «Телей», «Уяр» юрӑсен сӑввине ҫырнӑ, 10 ытла кӗнеке пичетлесе кӑларнӑ.

Уяв умӗн Анатолий Ильич пурнӑҫӗ-хӗлӗпе паллаштаракан фильм кӑтартрӗҫ, вӗҫленнӗ хыҫҫӑн — викторина та ирттерчӗҫ.