Паян, акан 24-мӗшӗнче, М.И.Скворцов хатӗрленӗ икӗ томлӑ __http://www.i-sum.su/t/21553.html_Вырӑсла-чӑвашла сӑмах кӗнекин__ хӑтлавӗ иртрӗ. __Чӑваш чӗлхи кунне__ халалланӑскер Чӑваш Республикин Наци вулавӑшӗнче кӑнтӑрла иртни 2 сехетре пуҫланчӗ.

Савӑнӑҫлӑ пухӑва филологи ӑслӑлӑхӗсен кандидачӗ, Чӑваш патшалӑх гуманитари ӑслӑлӑхӗсен институчӗн сӑмах кӗнеки, ярӑмлӑ кӑларӑм тата электронлӑ энциклопеди пайӗн пуҫлӑхӗ __Дегтяров Г.А.__ ертсе пычӗ, ӗҫтешӗн сулмаклӑ утӑмӗсем ҫинчен каларӗ, словарь тӑвас ӗҫ йывӑр пулнине палӑртрӗ.

Пысӑк залра лӑк тулли халӑх. Тухса калаҫакансем хушшинче __Скворцоы Михаил Иванович_Михаил Ивановичпа__ пӗрле ӗҫленӗ тус-юлташӗсем, тӑванӗсем, вӗренекенӗсем пулчӗҫ. Вӗсем словарь ӑстин паха енӗсене палӑртса хӑварчӗҫ, сӑмах кӗнекине пахаларӗҫ. Чӑваш Республикин Наци библиотекин директорӗ Лизакова Р.М. ӑсчаха малалла та ӑнӑҫлӑ ӗҫлеме вӑй-хал сунчӗ. Чӑваш Республикин вӗрентӳ институтӗнчи чӑваш чӗлхипе литература кафедрин доценчӗ Иванова Н.Г. «Вӗрентӳ системинчи чӑваш чӗлхипе литератури кафедрин пӗлтерӗшӗ тата М.И. Скворцов профессор» темӑпа анлӑ тухса калаҫрӗ, хисеплӗ профессорӑмӑрӑн вышкайсӑр пысӑк ӗҫне хак пачӗ. __Шупашкар районӗнчи__ __Кӑшавӑшри__ вӑтам шкул вӗрентекенӗ Майков Е.А. та хӑйӗн сӑмахӗнче Михаил Иванович словарь ӑсти пулни ҫинчен тепӗр хут палӑртрӗ, шкул ачисен ячӗпе тав каларӗ. Филологи ӑслӑлӑхӗсен докторӗ __Н.И. Егоров__ словарь ӗҫӗн паянхи чӗлхе пурнӑҫӗнчи вырӑнӗпе пӗлтерӗшӗ ҫинчен чарӑнса тӑчӗ. Чи пӗлтерӗшли — Чӑваш Патшалӑх Канашӗн депутачӗсен ячӗпе Михаил Иванович Скворцова «М.И.Ломоносов ҫуралнӑранпа 300 ҫул ҫитнӗ май» юбилей медалӗпе чысларӗҫ.

Юлашкинчен пурте пӗрле асӑнмалӑх сӑн ҫапӑнчӗҫ.