Хĕрĕх çул хушши
Ĕнер-паян пулнă пек,
Куçăм умĕнче
Иртет йĕрки-йĕркипе
Авалхи тĕнче:
Чĕрĕлеççĕ, тăраççĕ
Тĕттĕм чăвашсем;
Тăмана пек тухаççĕ
Юмăç-чĕлхеçсем;
Улталанса вĕсемпе,
Чăваш пурăнать.
Вĕсене уçман куçĕпе
Ырлать, пуççапать.
Кĕнекепе хута та
Вăл уйăраймасть,
Тĕнче тытан турра та
Асра тытаймасть,
Киремете килĕшме
Тихине пусать:
«Ан илччĕрччĕ вĕренме», —
Тесе кĕлтăвать.
Вĕренесрен пăрăнма
Мулне хĕрхенмест,
«Çутаттăрччĕ пуçăма», —
Теме пĕлмест.
Анчах иртет, çул иртет, —
Тĕнче улшăнать:
Тĕттĕм, тĕтре сирĕлет, —
Çутă уçăлать.
Пĕр хĕрĕх çул хушшинче
Пирĕн чăвашсен
Уçăлаççĕ хут çинче
Хĕсĕк куçĕсем.
Икел шăтса ӳснĕ пек,
Школсем уçăлать,
Ырă çын никĕс хунипе
Çирĕп пурăнать.
Вĕтĕ школсем варринче
Амăшĕ ларать:
Пĕтĕм чăваш хушшинче
Çутлăха сарать.
Калля-малля Атăлпа
Пăрахут куçать:
Чăваш ачи çăпатапа
Вĕренме каять.
Вăл пурăнать, вĕренет,
Ӳстерет ăсне.
Çын пулать те тирпейлет
Хăйĕн тăванне.
Ĕне çинĕ кĕнеки
Унăн тупăнать.
Чăваш пуклакрах чĕлхи
Ытарса вулать.
Хутран хуяканскерсем
Халь, харсăр пек,
Чухăн чăваш ачисем
Çунать чĕрипе:
«Епле майпа вĕренме
Кĕрес-ши?» — тесе.
Çапла пирĕн ĕмĕрте
Чăваш çыннисем.
1907-1908
Вулавçăсен шухăшĕ
Çĕнĕ комментари хуш
влад маскай (2018-08-22 21:12:53):
...хĕн çав, хĕнех хак пама Куля Пиччене! Çапах шарламасăр иртме майăм çук... пурнăçĕ мĕнле тата çавах вăхăтри? Куля Пиччен те сăввинче, ăнсăртран пулсан та, пирĕн çавтери каяюлнăлăхсем цивилизацирен çулçӳревçĕн ури айĕнчи пек, тумхахсемпе вĕçлĕ чулсем, чуна йĕпрен кемех мар шăтарасла ыраттарса иртсе каяççĕ!!!
Анчах та, Поэтăмăр Шупуççынни пысăк паăлханăвне пире те вулаччăр тесе парса хăварни - хаклăран та хаклă парне! Паллах, пурне те уçăлмасть ĕнтĕ йĕркесен хушшинчи халăхăн тăлăх пурнăçĕ. Çав "курманлăх" хальхи вăхăтра - чи пысăк ПЕЛЕ! тесе шутлатăп эпĕ. Çавăнпах тĕрлĕ кипкинчен те тухса типĕнмен университет пĕтернĕ ачасем Иван Яковлевич çине кунĕн -çĕрĕн "вĕреççĕ" те...Тав сана Поэтăмăр!