Тĕлĕнтермĕш хăнасем

Николай Леонтьев | Сăвă | аваллăх | хăна | 1 861


Ай-ай, пурнăçăм, мана

Эс ытла тĕлĕнтерен:

Килсе кĕчĕç хăнана

Икĕ çын леш тĕнчерен.

 

Пăхрăм та вĕсем çине

Кăшт сăмах вакланă май

Пĕлтĕм эп кукаçине.

Ну, тепри — ман кукамай.

 

«Манăн çук нимле парне,

Пысăк ĕмĕт çеç пур ман, —

Тет старик шăлса тарне, —

Аллă çул хĕвел курман».

 

Кукамай сăмах илет:

«Шел, тĕнчи ытла инçе.

Тахçанах килес килет...

Мĕн çĕнни пур çĕр çинче?»

 

«Пурăнатăр мĕнлерех? —

Кукаçи пуçлать ыйтма. —

Ваттисемсĕр хĕнтерех

Мар-и пурнăçа тытма?

 

Эп пилленĕ пурлăха

Еплерех тытса усран?

Тен, путартăн шурлăха

Ман чыса? Кала куçран».

 

«Эп салатрăм пĕтĕмпех

Сан мулна, — калап тӳртен. —

Çил вĕçтерчĕ тĕтĕмпе

Чыхăннă хура пӳрте.

 

Парса ятăм кĕсрене

Халăха. Унсăр пуçне

Илсе кайрĕç ĕçренех

Музее суха пуçне».

 

Юхан шывăн хăй сикки,

Кукаçин те хăй юрри:

«Манран юлнă хăй чикки,

Шĕшлĕ-калăпăм пур-и?»

 

Хыпса çунчĕ кукамай:

«Ах, ăçта-ши турчăка?»

Газ кăварĕ пăтратма

Кирлĕ-шим вăл карчăка?

 

«Ăçта манăн мăлатук?

Час туп!» — терĕ кукаçи.

«Манăн çурлана та туп!» —

Карчăк пулчĕ вăрçанçи.

 

«Вĕсене, тăванăмсем,

Эп ăçтан тупса килем?

Уйăх кăкăрне вĕсем

Халь кӳреççĕ-çке илем.

 

Ĕлĕкхи саманаран

Хальхи пурнăç пит инçе.

Тĕлĕнтермĕш мăй таран —

Юмахри пек халь тĕнче.

 

Çичĕ тинĕс леш енчи

Сасăна илтет этем,

Çичĕ тинĕс леш енчи

Этеме курать этем.

 

Пĕр çемьепеле лăках

Тулнă пĕчĕк пӳрт авал.

Халĕ пĕр çурта лапах

Шăнăçать пĕр пысăк ял.

 

Этем вилнĕччĕ тин çеç:

Куç хупса илнĕ çĕре,

Авă, тухтăр аллинче

Çĕнĕрен тапать чĕре.

 

Хĕвелпе тыр-пул ĕнет —

Этем çумăр çутарать.

Хăй сĕтне мăкла ĕне

«Чăрăша» халь сутарать.

 

Халь халап куçать чăна,

Чăнлăх халапа куçать.

Пĕлĕтре те халь, чăнах,

Этем çĕртри пек хуçа.

 

Андриян, чăваш каччи,

Хурçă урхамах çинче

Чупса килчĕ катаччи

Шурă пĕлĕт тăрринче.

 

Сирĕн ĕмĕтри телей

Пирĕн алăра паян.

Çав ятпа эртелпеле

Юр юрлар-и ян та ян».

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: