Шыва путмарăмăр, çынна сутмарăмăр


I

Санпа пĕрле чухне сăмах çăмхийĕ çăмăл —

Йĕркеллĕн, килĕшӳллен, сумлăн сӳтĕлет.

Калаçнăçем вара яр уçăлать ман кăмăл:

Иртни, хальхи йăлтах чĕлхе çине килет.

 

Эп улттă тултарсан хăрушă, çăткăн вилĕм

Уйăрчĕ пирĕнтен юратнă аннене.

Пĕр тăвансем — виç аппапа пичче — пĕр вĕçĕм

Выртса макăртăмăр ун вилтăпри çине.

 

Çурла уйăхĕччĕ. Хирте ыраш выратчĕç

Ял-йышпала каçапăкра тăванăмсем.

Мана хăйсемпелĕ пĕрле илсе каятчĕç:

«Часрах ĕçе вĕрентĕр», — тетчĕç аппасем.

 

Кулянмалли хăр тăлăхсемшĕн пит нумай,

Пĕрмай эп макăраттăм чун хурланнă май.

 

II

Çав вăхăтра аттемĕр пирĕн асапланнă

Çынсемшĕн тамăк пулнă Çĕпĕр тайгинче.

Унта ăна çул пуç путевкипе» ăсатнă:

Вăл чăрмантарнă-мĕн колхоз тăвассинче.

 

Колхоз хуçи Ефрем шап-шур хута йĕрленĕ,

Ĕненнĕ хăй çырни ĕçе пуçлассине.

Иваш, Илмук, Кришук тусĕсене чĕнтернĕ:

«Çак хут çине ал пусăр», — тенĕ вĕсене.

 

Ефрем Крачнов хăй çырнине саспа вуларĕ,

Элекçĕсен хайлавĕ акă еплерех:

«Çпиркка куç кĕретех колхозсене хурларĕ,

Тăшман ан пултăр пирĕн хушăра текех».

 

Сутăнчăксем хуптарнă пирĕн аттене —

Çылăхĕсемшĕн лекнĕ тамăк хуранне.

 

III

«Атте çукки — çур тăлăх», — халăхра калаççĕ,

«Анне çукки — хăр тăлăх», — теççĕ ваттисем.

Пире хăр тăлăха хăварчĕ Сталин влаçĕ,

Çапах выçса вилмерĕмĕр — пĕр тăвансем.

 

Пире çаратрĕç: çуртсене пăсса турттарчĕç,

Колхоз валли хăпартрĕç хăтлă кĕлетсем;

Çемье валли пӳртпе мунча кăна хăварчĕç

Ефремăн ик ураллă чунсăр йыттисем.

 

...Синкерлĕ, юнлă самана иртсе çухалчĕ,

Анчах курни, тӳсни ман асăмран тухмасть.

Хĕвел çĕкленчĕ тухăçран — тĕнче çуталчĕ,

Юратнă ĕçĕмре чĕрем тунсăхламасть.

 

Шыва путмарăмăр, çынна сутмарăмăр,

Ĕçе, пурнăçа чунтан юратрăмăр.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: