«Салам, çĕн яш-кĕрĕм, тин курнă çĕн тĕррĕм...»

Юхма Мишши | Сăвă | 580


Салам, çĕн яш-кĕрĕм, тин курнă çĕн тĕррĕм.

Мĕскер илсе килтĕр эсир тĕнчене?

Мĕскер пур сирте? Çĕнĕ ĕмĕт е сĕрĕм?

Пĕлесчĕ мĕскершĕн эсир çуннине.

 

Салам, çĕн яш-кĕрĕм!

Сире эп чĕнетĕп

Паян ман эткерĕн калчийĕ çине.

Сире юратса çĕн пуласлăх пиллетĕп,

Тухар-ха пĕрле çут хĕвел тĕнчине.

 

Салам, çĕн яш-кĕрĕм!

Сирте эп куратăп

Çитмен ĕмĕтсен чи паха çутине.

Мĕскер тăваймарăм, çавна эп шанатăп

Эсир йалт туса çитерессисене.

 

Салам, çĕн яш-кĕрĕм!

Нумай çул иртсессĕн

Пире аса илĕр кунçул уттинче.

Пит йывăр чухне иртнине ас илсессĕн

Ан манăр пире те хĕвел тĕнчинче.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: