Электронлă вулавăш

Ан кулянсам, савни, ан хурлан.

Эс йĕрсе çут куçна ан пăссам!

Вăхăт урăх, йĕме тивĕç мар,

Йывăр шухăш ан пултăр, – пусар.

 

Макăрмашкăн маншăн – эп вилмен,

Маншăн пурнăç сĕткенĕ типмен...

Эп хавас ирĕк халăх çĕрне

Сыхламашкăн мĕн пур чĕрепе!

 

Ман юлташ халĕ урăх – пăшал;

Сар хĕртен те вăл маншăн паха.

Эп ăна сан пекех ачашлап,

Хамăн çирĕп аллăмра хыт тытап.

 

Эп хавас. Маннă эп макăрма.

Маншăн илемлĕ, чипер касăрма*.

Эп хавас хастар шухăшпа,

Вĕт мĕн пур çут тĕнче ман умра.

 

Нумай мар – ик çул çеç, ик çĕрте

Курнăçмасăр пурнăпăр пĕр-пĕрне.

Вăхăт шухă, иртĕ хăвăртах –

Сисеймĕн те, таврăнăп каллах.

 

Эс сисетни, савни, çут тĕнчен

Урăх сăн вĕлкĕшет питĕнче.

Эс сисетни – пурнăç çĕнĕ шăлт,

Çĕн тумтир тăхăннă çĕрĕ йăлт.

 

Кунран-кун улшăнать самана,

Илемленĕ кун-çул яланах,

Йăлтăртатĕ çап-çутă ял хушши,

Йăлтăртатĕ электрицă çути.

 

Хура хăмăр уй тăрăх хурçă ут

Кунĕпе çавăрнĕ çĕршер хут.

Чечекленĕ вара тăван çĕршыв.

Пахаланĕ çĕн ĕçлĕ ял-йыш...

 

Ан йĕрсем, сарă хĕр, ан кулян!

Макăрма тивĕç мар вĕт паян.

Йăлтăртатрĕ, тухрĕ сар хĕвел,

Йăл кулчĕ ăна хирĕç тĕпел.

 

Çĕнĕ пурнăç кӳрет çĕн саман,

Кивĕ пурнăç тĕмескеллĕ, кичем.

Çулĕ уçă – утар малалла.

Пурнăç йĕвенне тытар-ха алла!

 

12-XII—27ç., Ленинград

Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —

Хаклав:

Шухăшĕ: --...вăйсăр...мухтамаллах   мар...вăйлă
Чĕлхе илемлĕхĕ: --...илемсĕр...чаплах   мар...илемлĕ
Содержанийĕ: --...ăшах...вăтам...тарăн