Мухтар мучи ачисем


Мухтарах та мучи ачисем,

Çут çăлтăр пек çивĕч куçлисем.

Çунат çукран çунат хушаççĕ,

Ялăмăртан ялан тухаççĕ,

Асăмăртан нихçан тухмаççĕ.

 

Мухтарах та мучи ачисем —

Çĕрте пĕрех çĕрте çулĕсем, —

Çурçĕре çитсессĕн пĕрисем —

Кăнтăрта пулаççĕ теприсем,

Тухăçран анаççĕ анăçа,

Нихăçан пĕлмеççĕ канăçа.

 

Мухтарах та мучи ачисем —

Сар кăлкан пек сарă çӳçлисем,

Ялăмăртан ялан тухаççĕ, —

Сарă тулла çуллен пухаççĕ,

Асăмăртан нихçан тухмаççĕ.

 

Мухтарах та мучи ачисем —

Çĕрте пĕрех çĕрте ĕçĕсем,

Алтая каяççĕ тыр акма,

Ĕç панче пĕлеççĕ тар тăкма,

Алтайран кураççĕ Атăла,

Юрласа уçаççĕ кăмăла.

 

Мухтарах та мучи ачисем —

Ялăмăрта ялан ятлисем,

Инçе çула ялан тухаççĕ,

Кĕмĕлех те кермен лартаççĕ,

Асăмăртан нихçан тухмаççĕ.

 

Мухтарах та мучи ачисем —

Çĕрте пĕрех çĕрте аллисем.

Çурçĕре каяççĕ çул тума,

Сивĕре пĕлеççĕ ăшăнма.

Аякран кураççĕ Атăла,

Юрласа уçаççĕ кăмăла.

 

Мухтарах та мучи ачисем,

Çут çăлтăр пек çивĕч куçлисем,

Çунат çукран çунат хушаççĕ,

Ялăмăртан яла тухаççĕ,

Асамăртан нихçан тухмаççĕ.

 

Мухтарах та мучи ачисем,

Çĕрĕмĕртен çулта çунатсем.

Çĕр тавра çӳреççĕ çаврăнса,

Паттăр çын пулаççĕ таврăнса.

Космосран кураççĕ Атăла,

Юрласа уçаççĕ кĕмăла.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: