Ҫӑлкуҫ: shisu_ka/Shutterstock/FOTODOM

Бингемтон тата Бригам Янг университечӗсен ӑсчахӗсем ача чухне ҫынран ютшӑнни ҫитӗнсен эрех ӗҫес кӑмӑла ӳстерме пултарнине палӑртнӑ. Тӗпчевҫисем йӗкехӳресем ҫинче эксперимент ирттернӗ. Вӗсене икӗ ушкӑна пайланӑ: пӗррисем хӑйсен йышӗнче ӳснӗ, теприсене вара пӗчӗк чухне уйӑрса усранӑ.

Ҫитӗнсен ыттисенчен ютшӑнса ӳснӗ чӗрчунсен хӑраса пӑшӑрханни вӑйлӑрах палӑрнӑ, вӗсем уҫӑ вырӑнсенчен пӑрӑннӑ. Каярахпа ӑсчахсем вӗсене шывпа спирт хутӑшӗнчен пӗрне суйласа илме сӗннӗ. Уйрӑмшарӑн ӳснӗ йӗкехӳресем эрехе нумайрах суйланӑ.

Ӑсчахсем ку чӗрчунсен пуҫ мимийӗ мӗнле ӗҫленине тӗпченӗ. Эрех ӗҫсен вӗсен дофамин шайӗ сахалрах улшӑннӑ. Ҫавӑнпа та тивӗҫлӗ витӗм илес тесе вӗсен организмне ытларах спирт кирлӗ пулнӑ. Пӗчӗк чухнехи стресс пуҫ мимин химилле реакцине тӗплӗн улӑштарнӑ.

Малашне тӗпчевҫӗсем ҫак улшӑнусен никӗсӗнчи белоксемпе клетка процесӗсене тӗпчеме палӑртаҫҫӗ. Ку эрех чирӗнчен сиплемелли ҫӗнӗ меслетсем тупма пулӑшмалла, уйрӑмах — ачалӑхри йывӑрлӑхсемпе ҫыхӑннӑ лару-тӑрура.

#эрех, #ӗҫкӗ, #ӑсчахсем, #тӗпчевсем