Пирӗн ентеш, Йӗпреҫ пики, Евгения Петрова (сӑнӳкерчӗкре — сулахайра) «Хусан мисӗ» илем конкурсӗнче ҫӗнтернӗ.
Евгения Петрова 20 ҫулта кӑна-ха. Вӑл Йӗпреҫри 1-мӗш шкулта вӗреннӗ хыҫҫӑн Раҫҫей ШӖМӗн Хусанти юридици институчӗн студентки пулса тӑнӑ.
Евгения — пулас офицер, вӑл спортпа туслӑ, волейбол командин ертӳҫи. Ҫавӑн пекех пике халӑх, бал ташшисемпе кӑсӑкланать.
Ҫитес вӑхӑтра Евгения Петровӑн Тутарстан чысне «Раҫҫей мисӗ» конкурсра хӳтӗлеме тивӗ.
Ӗнине таптаса кайнӑ, машина хуҫине вара куншӑн 1 миллион тенкӗ тӳлемелле. Ҫавӑн пек лару-тӑрӑва лекнӗ Пӑрачкав округӗнчи хӗрарӑм.
Авари «Йӗпреҫ – Березовка – Кудеиха» ҫул ҫинче каҫхине пулнӑ. Ӗне «Киа» машина айне пулса вилнӗ. Машина вара самай сиенленнӗ. Экспертиза тунӑ та – тӑкак 2 млн та 867,7 пин тенкӗпе танлашнӑ. Машинӑн пасарти хакӗ – 3,7 млн тенкӗ.
Суд ҫапла йышӑну тунӑ: хӗрарӑмӑн машина хуҫине 1 млн та 33,9 пин тенкӗ тӳлемелле.
«М-12» ҫулпа пынӑ чухне патшалӑхӑн ҫул-йӗр инспекторӗсем ватӑ ҫынна асӑрханӑ. Ун тӗлӗнче чарӑннӑ та калаҫу пуҫарнӑ. Ватӑ арҫын хӑй ӑҫта кайма тухнине те, ӑҫта пурӑннине те калайман.
Вӗсем хӑйсен базине тишкернӗ те ҫухалса ҫӳрекен арҫын Йӗпреҫре пурӑнакан 78 ҫулти мучи пулнине палӑртнӑ. Вӑл унччен те килӗнчен тухса кайкаланӑ иккен.
Йӗрке хуралҫисем ватӑ ҫынна килне леҫсе хӑварнӑ, ҫывӑх ҫыннисем уншӑн питӗ савӑннӑ.
Йӗпреҫре ҫуралса ӳснӗ Андрей Михайловӑн (Малай) фильмӗнче Ксения Бородинӑпа Алексей Чадов ӳкерӗнеҫҫӗ. Фильм «За любовь» ятлӑ. Вӑл 2026 ҫулта экран ҫине тухӗ.
Андрей режиссурӑпа Чӑваш Енре пурӑннӑ чухне кӑсӑкланма тытӑннӑ. Вӑл ку таранччен кӗске метражлӑ фильм, сериал ӳкернӗ. Унӑн ӗҫӗсем кинофестивальсенче те ҫӗнтернӗ.
Палӑртса хӑварар: хальхи вӑхӑтра режиссёр ҫемйипе Мускавра пурӑнать. Ҫапах Чӑваш Ен пирки манмасть, ӑна ырӑпа кӑна аса илет.
Йӗпреҫ лесничествинче «Чи лайӑх вӑрман пушарнӑйӗ» Пӗтӗм Раҫҫейри конкурсӑн регионти тапхӑрӗ иртнӗ. Унта 15 специалист тупӑшнӑ.
Вӗсем теори заданийӗсене пурнӑҫланисӗр пуҫне хӑйсене спорт енчен те кӑтартнӑ: чупнӑ, отжимани тунӑ, турникран туртӑннӑ. Практика заданийӗсем те пулнӑ: условлӑ пушара сӳнтернӗ, чӑрмавлӑ ҫула парӑнтарнӑ.
Пӗрремӗш вырӑна Шӑмӑршӑ лесничествин ӗҫченӗ Марат Азизов йышӑннӑ. Иккӗмӗшпе виҫҫӗмӗш вырӑнсене Ҫӗнӗ Выҫли лесничествинчи Дмитрий тата Сергей Ивановсем тухнӑ.
Чӑваш Енри учительсем премие тивӗҫнӗ. Телейлисен йышне 11 ҫын кӗнӗ.
Республика Пуҫлӑхӗн хушӑвӗпе килӗшӳллӗн Куславккари 3-мӗш шкулта ӗҫлекен Алевтина Алексеева 150 пин тенке тивӗҫнӗ. Вӑл кӑҫал «Чӑваш Енри ҫулталӑкри учитель» конкурсра ҫӗнтернӗ. Шупашкарти 3-мӗш садикре вӑй хуракан Дарья Жгарь – «Чӑваш Енри ҫулталӑкри воспитатель». Вӑл 100 пин тенке тивӗҫнӗ.
Ыттисене 50 пин тенкӗ парӗҫ. Вӗсем – Юлия Дельян (Ҫӗнӗ Шупашкарти 13-мӗш шкул), Яна Молодцова (Шупашкарти 55-мӗш шкул), Татьяна Анилина (Куславкка округӗнчи Тӗрлемесри шкул), Ксения Коллэ (Шупашкарти 1-мӗш гимнази), Ирина Петрова (Йӗпреҫри интернат шкул), Наталья Прагуськина (Шупашкарти хавшак ачасен 2-мӗш шкулӗ), Игорь Ятмаскин (Шупашкарти 62-мӗш шкул), Татьяна Гаранина (Ҫӗнӗ Шупашкарти 44-мӗш ача сачӗ), Ираида Матьянова (Шупашкарти хавшак ачасен 2-мӗш шкулӗ).
«Ҫулталӑкри вӗрентекене» палӑртнӑ. Ку ята Куславккари Алевтина Алексеева тивӗҫнӗ.
Кӑҫал конкурса 1000 ытла ҫын хутшӑннӑ, 218 специалист куҫӑн майпа иртнӗ тӗрӗслев витӗр тухнӑ.
«Ҫулталӑкри воспитатель» — Дарья Жгарь (Шупашкар), «Чи лайӑх класс ертӳҫи» — Юлия Дельян (Ҫӗнӗ Шупашкар), «Ҫулталӑкри педагог-психолог» - Татьяна Анилина (Куславкка районӗнчи Тӗрлемес шкулӗ), «Ҫулталӑкри социаллӑ педагог» - Яна Молодцева (Шупашкар), «Чи лайӑх учитель-дефектолог» - Татьяна Гаранина (Ҫӗнӗ Шупашкар), «Чи лайӑх тӑван чӗлхе учителӗ» - Ираида Матьянова (Шупашкар), «Сывлӑх енчен хавшак ачасемпе ӗҫлекен чи лайӑх педагог» - Ирина Петрова (Йӗпреҫри интернат шкул), «Ҫулталӑкри чи лайӑх тьютор» - Наталия Прагуськина (Шупашкар), «Ҫулталӑкри чи лайӑх методист» - Ксения Коллэ (Шупашкар), «Педагогика дебючӗ» - Игорь Ятмаскин (Шупашкар).
Йӗпреҫ поселокӗнче пурӑнакан 78 ҫулти ватӑ тротуарпа утса пынӑ чухне шуҫса ӳкнӗ. Пӑтӑрмахра шар курнӑ ҫын тухтӑрсенчен пулӑшу ыйтнӑ.
Чӑваш Енӗн прокуратуринче пӗлтернӗ тӑрӑх, инкек Мересьев урамӗнчи пӑрлакаланса ларнӑ тротуара пула сиксе тухнӑ.
Пӗлтӗрхи раштав уйӑхӗнче пулнӑ пӑтӑрмахра шар курнӑ пенсионера хӳтӗлесе прокуратура суда тавӑҫпа тухнӑ. Надзор органӗ ватта кӑмӑл-сипет тӗлӗшӗнчен сиен кӳннине саплаштарма ыйтнӑ. Суд вырӑнти тӳре-шарана пенсионера 30 пин тенкӗ тӳлеттерме йышӑннӑ.
Чӑваш Енре ҫурхи сунар тапхӑрӗ пуҫланнӑ. Вӑл паянтан пуҫласа ака уйӑхӗн 30-мӗшӗччен пырӗ.
Сӑмах май каласан, пирӗн тӑрӑхра сунар улӑх-ҫаранне икӗ зонӑна уйӑрнӑ: пӗрремӗш тата иккӗмӗш. Кашни зонӑра сунар тапхӑрне палӑртнӑ.
Пӗрремӗш зонӑна Улатӑр, Патӑрьел, Йӗпреҫ, Комсомольски, Пӑрачкав, Шӑмӑршӑ, Ҫӗмӗрле, Елчӗк тӑрӑхӗсем кӗреҫҫӗ.
Иккӗмӗш зонӑра — Элӗк, Вӑрнар, Канаш, Куславкка, Красноармейски, Хӗрлӗ Чутай, Сӗнтӗрвӑрри, Муркаш, Вӑрмар, Ҫӗрпӳ, Шупашкар, Етӗрне, Тӑвай районӗсем.
Чӑваш Енӗн тава тивӗҫлӗ вӑрманҫи Геннадий Хураськин вӑрман хуҫалӑхӗнче ӗҫлеме пуҫланӑранпа 40 ҫул та иртсе кайнӑ. Ӗсе вӑл Пӑрачкав тӑрӑхӗнчи вӑрман хуҫалӑхӗнче пуҫланӑ. Юлашки ҫулсенче вӑл Йӗпреҫри пушарпа хими станцийӗн пуҫлӑхӗнче тӑрӑшать. Вӑл ҫине тӑнипе атвопарка ҫӗнетнӗ, ҫӗнӗ оборудовани туяннӑ.
«Вӑрман — пирӗн иксӗлми пуянлӑх. Ӑна упарса хӑварассипе эпӗ те тӑрӑшнишӗн чунтан савӑнатӑп», — тет вӑл.
+15.5 °C